Dugang-suhulan, pagpanalipud sa katungod ug kaayuhan sa mga minoryang kasarian, pagdepensa sa nasudnong soberanya ug tawhanong katungod ang pipila ka sa tataw nga panawagan sa gilunsad nga Pride March niadtong Hunyo 24. Nanguna sa aktibidad ang Bahaghari, usa ka nasudnong-demokratikong organisasyon nga nagapanalipud sa mga katungod sa LGBT+ sa nasud.

Gipangunahan sa grupo ang protesta sa Southern Tagalog Pride, Metro Baguio Pride, ug Central Luzon Pride. Nakighiusa usab kini sa martsa sa liboang LGBT+ ug ilang mga alyado sa Makati City ug Quezon City.

Kapin 500 ang misalmot sa martsa sa Metro-Baguio Pride gikan Session Road ngadto sa Igorot Park. Napuno ang protesta sa mabulukong bandera sa balangaw (rainbow), mga plakard nga adunay lain-laing panawagan ug mga pasundayag. Naglunsad usab sila og Pride Fair sa Igorot Park gikan Hunyo 21 hangtud Hunyo 23.

Sa Laguna, nagtapok ang gatusan ka delegasyon sa lain-laing sektor gikan sa Southern Tagalog sa kampus sa Unibersidad ng Pilipinas-Los Baños isip selebrasyon sa Pride Month. Aduna usay dakung panagtapok sa Angeles City, Pampanga. Susamang mga protesta ang gilunsad usab sa lain-laing grupo sa Biñan sa Laguna, ug Cebu City. Aduna usay aktibidad sa Dumaguete City ug Mandaue City niadtong Hunyo 25.

Gidumdum usab sa Bahaghari niining adlawa ang kinaunhang Pride March sa Pilipinas nga gilunsad sa Pro-gay, usa ka nasudnon-demokratikong organisasyon sa mga bayot, niadtong 1994. Kini usab ang pinakaunang martsa sa tibuok Asia.

Gisuportahan usab sa Bahaghari ang SOGIE bill (Sexual Orientation, Gender Identity, and Expression) sa kongreso nga nagaila sa mga katungod sa mga LGBT+.