Nagrali atubangan sa Nepa-Q Mart sa Quezon City niadtong Hulyo 3 ang mga mamumuo sa National Capital Region aron makmakon ang ₱40 nga gidugang sa regional wage board sa ilang suhol. Kini nga umento, nga madawat sugod Hulyo 16, tugbang lamang sa 7% pagtaas sa kasamtangang suhulan sa rehiyon. Gimakmak nila ang “sinsilyong minimum” sa rehimeng Marcos.

Sa gipagula nga kamandoan, motaas ang suhulan sa mga mamumuo sa agrikultura, serbisyo ug negosyong retail gikan ₱533 ngadto sa ₱573. Ang mga industriyang gawas sa agrikultura magadawat og ₱610 gikan sa kanhing ₱570. Layo kaayo kini sa makabuhi nga suhulan nga ₱1,160 kada adlaw alang sa usa ka lima-katawong pamilya niadtong Abril. Ubos kaayo kini bisan ikumpara sa sugyot nga ₱150 across-the-board nga gisumite sa Senado.

Sayod ang mga mamumuo nga daku pa ang kinahanglang iduso alang sa dugang suhulan. Kung ang mga kapitalista ug estado ang masunod, wala o mas ubos pa ang ihatag nga umento sa rason nga makapataas kini sa tantos sa implasyon o makalugi sa negosyo. Nagsaad silang pakusgon pa ang pakigbisog alang sa makatarunganong dugang-suhulan sa tibuok nasud.