Nireyd dagiti operatiba ti National Investigation Agency (NIA) ti reaksyonaryo a gobyerno ti India dagiti opisina ti naduma-duma a demokratiko ken maka-umili nga organisasyon iti Andhra Pradesh ken Telengana idi Oktubre 2. Iti report ti Forum Against Corporatization and Militarization (FACAM), saan a bumaba iti 12 organisasyon ti inatake dagiti pwersa ti estado. Ti panagraut ket adda kainaigan na iti ibagbaga a kaso ti “silpo kadagiti Maoista” dagiti organisasyon idi 2021.

Naaresto iti reyd ni Chandra Narasimhulu, maysa nga opisyal ti Pragatisheela Karmika Samakya (PKS) iti Andhra Pradesh. Segun iti FACAM, parparuaren ti gobyerno ti India a naala kenkuana ti 1.3 milyon a rupee ken maysa a pistola nga addaan balbala.

“Dagitoy nga organisasyon ket nabayagen a tumaktakder laban kadagiti panaglabsing iti karbengan-tao ken panangparmek iti demokratiko a panangirupir laban iti panaggamrud dagiti korporasyon iti aglaplapusanan-iti-nainsigudan a kinabaknang nga akintengnga a rehiyon ti India,” segun iti FACAM.

Segun pay iti grupo, dagitoy a reyd ket paset ti padron ti panangparmek kadagiti progresibo ken demokratiko nga organisasyon iti intero nga India iti alegasyon ti “silpo kadagiti Maoista.” Makapadpadas met ti panangliplipit ken reyd dagiti dadduma pay nga organisasyon iti sabali nga estado ti India kadagiti ar-aramid nga alegasyon. Taktika kano daytoy tapno parmeken ken paulimiken ti amin a timek ti panagsupiat ken kritisismo iti gobyerno ti India.

Ti serye dagiti koordinado a reyd ket inyaramid iti 64 a lokasyon kadagiti estado ti Jharkhand, Bihar, Uttar Pradesh, Andhra Pradesh ken Telangana.