Nasken a sibubukel a tubngaren ti isaysayangkat a gerra a henosidyo ti US-Israel laban iti umili a Palestino. Iti napalabas a dua lawas, lallalo a pinakaro daytoy a gerra iti langa ti awan-sarday a panagbomba iti Gaza iti gandat a parmeken daytoy ken patakyasen dagiti agnanaed sadiay.

Inyapan ti estado ti Israel iti barbaro a tukad ti kinaulpit ti mano dekadan a henosidyo tapno interimente a papanawen dagiti Palestino manipud iti daga a nagtaudan da.

Mano ribu a bomba ti intinnag iti Gaza, maysa a parsela ti daga nga addaan kapuskulan a populasyon iti intero a lubong. Awan panangikankano nga inasinta ti panagbomba ti populasyon ken pasdek a sibilyan, karaman ti balbalay ken apartment, dagiti pagadalan, ospital, simbaan, ken pasdek pangsalun-at, dagiti pasdek a komersyal ken dagiti opisina ti negosyo ken midya. Winartak ti panagbomba dagiti pasdek para iti danum ken kuryente ken liplipiten ti suplay ti makan ken krudo.

Iti uneg ti dua lawas, saan a bumaba iti 4,100 Palestino iti Gaza ti natay, karaman ti nasurok 1,400 nga ubbing, kabayatan a nasurok milyon ti naawanan pagtaengan ken makapadpadas ti bisin ken panagdanag. Pinakaalinggaget ti panagmasaker iti nasurok 600 Palestino iti inaramid a panagbomba ti Israel iti maysa nga ospital iti amianan a paset ti Gaza nu sadinno rinib-ribu ti nakilinong ken agpapaagas.

Nasurok dua milyon a Palestino ti nasedsed iti Gaza, maysa a bassit a suli ti daga iti daya a baybay ti Mediterranean Sea. Pinalawlawan daytoy ti Israel ti nangangato nga alad, ken amin a panagruar-serrek ditoy ket kontrolado ti Israel Defense Force. Nasurok-kumurang tallo a milyon a Palestino met ti agnanaed kadagiti komunidad iti West Bank, maysa a teritoryo nga adda iti kontrol dagiti pwersa ti Israel, katinnulong ti Palestinian Authority nga impatakder iti bisa dagiti katulagan nga induron ti US.

Ti awan an-anawa a panagbomba iti Gaza ket mangipalpalagip iti naulpit a pakasaritaan ti panangidadanes a nalak-am dagiti Palestino. Ti daga dagiti Palestino ket rinabngis ti kolonyal a turay ti United Kingdom idi 1917. Manipud indeklara ti UK iti daydiay a tawen ti plano nga agitakder ti “pagilian dagiti Hudyo” iti daga ti Palestine, awanen sarday ti sinagrap a panangidadanes ken panangpatakyas kadagiti Palestino. Inyaramid daytoy iti nagan ti Zionismo, ti opisyal nga ideolohiya ti estado ti Israel, a nakakonsentra iti panangparmek iti umili a Palestino. Dimmanon iti tugatog daytoy a panangidadanes idi 1948 iti inawagan nga Al Nakba wenno Ti Didigra.

Nasken nga aginggana’t kabaelan a tubngaren ti imperyalismo a US iti agdadata a panagsuporta daytoy iti henosidyo nga isaysayangkat ti gobyerno ti Israel. Salsalakniban pay ti US iti nakakaro a krimen ken panangipayat ti Israel iti internasyunal a makatao a linteg. Plano pay ti gobyerno ti US nga ikkan ti $10 bilyon ti Zionista nga Israel, dakdakkel ngem iti tinawen a $7 bilyon nga it-ited na kas ayuda militar, a kadakkelan iti intero a lubong, kasukat ti panagserbi kas balwarte ti imperyalismo a US iti Middle East.

Kas umili a nakapadas ti kolonyal a panangsakop ken panangidadanes iti uneg ti mano gasut a tawen, ammo la unay ti umili a Pilipino ti malaklak-am ti umili a Palestino ken ti tarigagay da tapno isubli ti pudno a wayawaya iti daga a nagtaudan da.

Ti pannakidangadang ti umili a Palestino ken umili a Pilipino ket repreppeten met laeng ti pannakilaban iti komun a kabusor — ti imperyalismo nga US, ti bileg iti likod ti malaklak-am a kinaulpit ken pannakaidadanes. Agpada a nakasanggir iti US ken paspasurot iti amo nga imperyalista ti estado ti Israel a mangidaddadanes kadagiti Palestino, ken ti reaksyonaryo nga estado iti Pilipinas a mangidaddadanes iti umili a Pilipino.

Nakapadron iti awan-anawa a panagbomba ti US iti Afghanistan ken Syria “laban kadagiti terorista” ti maisaysayangkat a panagbomba itatta ti Israel iti syudad ti Gaza. Iti kasta met laeng a nakapadron ti inyaramid a panangrebbek iti Marawi idi 2017, ken ti awan-ressat a panagbomba itatta ti AFP iti naduma-duma a paset ti kaaw-awayan ti Pilipinas. Dagiti kumpanya a militar manipud US ken Israel ti para-suplay kadagiti eroplano, bomba, drone ken dadduma pay a ramit ti AFP iti isaysayangkat panagbomba ken armado a panangparmek iti linged ti “kontra-insurhensya.”

Dagiti armado nga opensiba a rinugian ti grupo a Hamas idi Oktubre 7 iti Gaza laban kadagiti pwersa militar ti Israel ket panaggil-ayab ti pungtot ti umili a Palestino iti mapadpadasan da nga awan-sarday a panangidadanes ken panangliplipit iti sidong ti Zionista nga estado ti Israel.

Ti armado a panaglaban dagiti Palestino ket aw-awagan a “terorismo” ti Israel ken ti US (uray ti gobyerno ni Marcos), kapada a kunkondenaren dagiti imperyalista amin dagiti armado a rebolusyonaryo a tignayan iti Pilipinas, India, Turkey ken dadduma pay a pagilian. Ngem kas ti ipakpakita iti henosidyo laban iti umili a Palestino, ti pudno a terorista ket ti estado ti Israel, nga addaan sibubukel a suporta ti imperyalismo nga US, ti numero uno a terorista iti intero a lubong. Terorismo ti estado met laeng ti mapadpadasan ti umili a Pilipino, iti inggagara a panagasinta dagiti armado a pwersa ti estado kadagiti saan nga armado nga umili tapno pabutngan ida ken parmeken ti panaglaban da.

Iti sango ti mapadpadasan a nailian a panangidadanes ti umili a Palestino ken umili a Pilipino, agpada da nga addaan karbengan nga agiggem ti armas ken daliasaten ti dalan ti armado a panaglaban. Ti pakasaritaan ti pannakidangadang ti umili a Palestino, kapada ti pakasaritaan ti pannakidangadang ti umili a Pilipino para iti nailian a wayawaya, ket pakasaritaan ti armado a panaglaban. Irusrussuat da ti gubat ti maysa a bassit ken nakapsut a pwersa, laban iti maysa a dakkel ken nabileg a pwersa. Agpada dagitoy a gubat ti umili a nainkalintegan ken addaan hustisya, supsuportaran ti nalawa a demokratiko a pwersa ti umili, ken sierto a makagun-od ti balligi.