Ginreyd sang mga operatiba sang National Investigation Agency (NIA) sang reaksyunaryong gubyerno sang India ang mga upisina sang nagkalain-lain nga demokratiko kag maki-pumuluyo nga organisasyon sa Andhra Pradesh kag Telangana sadtong Oktobre 2. Sa report sang Forum Against Corporatization And Militarization (FACAM), indi magnubo sa 12 ka organisasyon ang gin-atake sang mga pwersa sang estado. Ang mga paglusob ang kaangot sa ginahambal nga kaso sang “kaangtanan sa mga Maoista” sang mga organisasyon sadtong 2021.

Gin-aresto sa reyd si Chandra Narasimhulu, isa ka upisyal sang Pragatisheela Karmika Samakya (PKS) sa Andhra Pradesh. Sandig sa FACAM, ginapagwa sang gubyerno sang India nga nakuha sa iya ang 1.3 milyon rupee kag isa ka pistola nga may yara sang bala.

“Ang organisasyon nga ini ang madugay na nga nanindugan batuk sa mga paglapas sa tawhanon nga kinamatarung kag pagpanumpo sa demokratiko nga duso batuk sa pagpangawat sang mga korporasyon sa bastante-sa-dunang manggad sa sentro nga rehiyon sang India,” sandig sa FACAM.

Base pa sa grupo, ang mga reyd nga ini ang kabahin sang padron sang pagsumpo sa mga progresibo kag demokratiko nga organisasyon sa bug-os nga India sa alegasyon sang “kaangtanan sa mga Maoista.” Nakaagum man sang pagpang-ipit kag reyd ang iban pa nga mga organisasyon sa iban nga estado sang India sa mga hinimo nga alegasyon. Taktika kuno ini agud piguson kag pahipuson ang tanan nga tingog sang pagpamatok kag kritisismo sa gubyerno sang India.

Ang serye sang koordinado nga mga reyd ang ginpatigayon sa 64 ka lokasyon sang mga estado sang Jharkhand, bihar, Uttar Pradesh, Andhra Pradesh kag Telangana.