Inrussuat dagiti nailian-demokratiko nga organisasyon, iti panangiyuna dagiti timpuyog ti mangmangged ken anak ling-et, ti tallo aldaw a pammadayaw para kenni Jude Thaddeus Fernandez wenno Ka Jude, beterano nga organisador ti Kilusang Mayo Uno (KMU), iti University of the Philippines (UP)-Diliman idi Oktubre 10 aginggana Oktubre 12.

Ni Fernandez ket pinapatay dagiti pwersa ti estado idi Setyembre 29 iti pagdagdagusan na a balay iti Rizal. Pinaruar da a limmaban isuna, banag a pinaawan-kinaagpayso na ti fact-finding mission a napan iti lugar a nakapasamakan.

Pinarigat pay dagiti pulis ti pamilya nga alaen ti bangkay na. Inlibak da a ni Ka Jude ti pinapatay da, ngem ketdi maysa nga “Oscar Dizon” nga isu’t nakakabil a nagan iti ibagbaga a mandamyento nga insampa kenkuana.

Deka-dekadan nga organisador ti masa nga anak ling-et ni Fernandez. Nangrugi isuna a nagtignay idi 1975 kabayatan nga agad-adal isuna iti UP-Los Banos. Karaman isuna kadagiti nangiyuna ti kampanya para iti panangisubli ti demokratiko a sanggunian ti agad-adal, ti nawaya a pagiwarnak pang-kampus, representasyon dagiti agad-adal iti UP Board of Regents ken panangisubli ti Philippine History ken Institution iti kurikulum.

Kakuyog ti dadduma nga agtutubo manipud iti unibersidad, timmipon ni Ka Jude iti tignayan ti dasig a mangmangged ken mangmangged-talon iti panawen ti linteg militar. Nalatak ti nagbalin a papel na iti panag-organisa kadagiti mangmangged ti Sunripe Dessicated Coconut Industry iti Magdalena, Laguna, a nangiyuna iti panangibandera ti pudno, palaban ken makabayan nga unyonismo ken militante a pannakidangadang masa iti daydiay a panawen.

Binigbig met ti Partido Komunista ti Pilipinas ti dakkel nga imbingay ni Ka Jude kas proletaryo a rebolusyonaryo iti panangiyabante kadagiti pannakidangadang masa, kasta met ti armado a rebolusyonaryo a tignayan aglalo iti Southern Tagalog, pati met iti Central Luzon. Ti nabaknang a kapadasan na iti panag-organisa ken panagpatignay ti nagserbi a tarabay iti agtultuloy nga panagpapigsa ti tignayan masa kadagiti naduma-duma a rehiyon ken sektor.