Naklaat ti lubong idi inrussuat ti Izz ad-Din al-Qassam Brigades, ti armado a takiag ti grupo a Hamas ti Palestine, ti napnuan tured nga armado nga aksyon nga nangbuong iti terorismo ken nairut a kontrol ti Israel iti Gaza. Nagrugi ti aksyon nga inawagan nga Al-Aqsa Flood idi parbangon ti Oktubre 7 iti panangpalubos kadagiti misayl a timmarget kadagiti base ken pwersa a militar ti Israel.

Sinaruno daytoy ti panangraut ti rinib-ribu nga armado a Palestino a nangabut iti pambalud nga alad nga impalawlaw ti Israel iti Gaza. Napartak da a naparmek dagiti pwersa nga Israeli ken grupo a pwersa daytoy ti nabalud iti gubat.

Inlawag ti Hamas nga umuna, ti Al-Aqsa Flood ket maysa a depensibo nga armado nga aksyon a sungbat iti 75-tawenen a panagsagaba ti umili da iti sidong ti brutal a panagsakop ti Israel. Maikadua, sumursurot daytoy kadagiti pagannurutan iti gubat nu sadinno kangrunaan a target dagiti armado a pwersa ti Israel ken inikkan daytoy ti panangiyalikaka iti panangsalaknib kadagiti sibilyan.

“Iti napalabas a 75 tawen, mawaw ti umili a Palestino iti wayawaya ken panagdesisyon iti bukod,” impablaak ti daulo ti Hamas iti maysa a nakabidyo a pablaak. Daytoy a basaran a karbengan ket laplapdan ti okupasyon ti Israel ken kainutilan ti internasyunal a komunidad a takderan ti obligasyon na daytoy basar iti nakaad-adun a resolusyon iti United Nations tapno magun-od ti nailian a karbengan ti Palestine.

“Awan makaipawel iti karbengan ti asinnoman nga umili a sinakop a labanan ti mannakop babaen iti aniaman ken amin a pamuspusan, karaman ti armado a panaglaban,” segun iti Hamas. Nakuna daytoy, namin-ano a daras daytoyen a nagpakdaar ti panagbettak ti pungtot dagiti Palestino gapu iti kinaawan sarday ken sobra-sobra a kinaulpit ti Israel. Karaman ditoy ti paulit-ulit a panangraut dagiti pwersa nga Israeli iti moske ti Al-Aqsa, maysa a sagrado a lugar para kadagiti Palestino, okupasyon kadagiti nabatbati a teritoryo da iti Jerusalem, ken panagulpit kadagiti balud politikal. Inted met a basaran ti Hamas ti awan anawa a panangkubkob ti Israel iti Gaza iti napalabas a 17 tawen ken ti panangalad iti syudad tapno mapupok iti tinudingan a “kadakkelan a nakalukat a pagbaludan” ti milyun-milyon a Palestino.

“Ti natan-ok a panaglaban dagiti Palestino ket naglukat ti baro a tukad ti pannakiranget para iti dayaw,” indeklara met ti Masar Badil (Palestinian Alternative Revolutionary Path Movement.)

Nagpanawagan met ti Popular Front for the Liberation of Palestine kadagiti amin a Palestino iti West Bank, Al Quds ken kadagiti teritoryo a sinakop ti Israel nga “agtignay ken parubruben ti maysa a komprehensibo nga intifada (panagrukuas ti masa) iti sango ti kriminal a kabusor ken paspasurot daytoy a setler” kas sungbat iti panagmasmasaker ti Israel.

Brutal nga okupasyon

Naranggas a pinunas ti pagilian a Palestine idi 1948 iti inawagan nga Al Nakba (Ti Didigra) kagiddan ti panangbukel ti estado ti Israel. Matantantya a 500 komunidad ti winartak, 15,000 Palestino ti pinapatay ken 750,000 ti pinatakyas dagiti idi ket Zionista a paramilitar. Sinakop daytoy ti 78% nga idi ket pagilian a Palestine, ken ti laeng nagsina a tipak iti West Bank ken Gaza ti inbati kadagiti Palestino.

Kadagiti sumaruno a dekada, rinib-ribu pay a Palestino ti pinapatay ken milyun-milyon ti pinatakyas iti awan bubussugan a panag-gamgam ti daga ken rekurso ti Zionista a rehimen. Dumandanon iti 250 “settlement” ti iligal nga impatakder daytoy iti West Bank ken East Jerusalem. Iti East Jerusalem laeng, dumandanon iti 100,000 ektarya ti inagum ti Israel.

Turturayan ti Zionista a rehimen ti kinabaknang ken rekurso ken tunggal aspeto ti biag Palestino, aglalo iti West Bank. Katinnulong ti Palestinian Authority nga intakder ken ponpondoan ti Israel ken US, impwesto daytoy ti pasista a makinarya tapno parmeken amin a panaglaban ti umili a Palestino ken in-inut a punasen ti puli da. Laksid iti inaldaw a panangidadanes ken panagranggas, saan a bumaba iti uppat a mayor a kampanya militar ti inrussuat daytoy iti Gaza manipud 2007 iti panaggandat a pagparintumengen ken rebbeken ti panaglaban ti umili ditoy.