Pinatay dagiti pwersa ti Armed Forces of the Philippines (AFP) iti tallo nga agduduma nga insidente ti maysa a 2 tawen nga ubing ken lima a sibilyan iti Negros Occidental, Abra, ken Western Samar kadagiti napalabas a lawas. Kadagitoy nga insidente, pinaruar ti AFP a mannakigubat ti New People’s Army (NPA) dagiti biktima tapno ilimed ti krimen da.

Iti Western Samar, pinatuduan ti bala dagiti soldado ti 63rd IB ti balay ti pamilya Obiado iti Sityo Salvacion, Barangay San Nicolas, San Jose de Buan idi Setyembre 25. Sigida a natay iti pannakapaltog ti mannalon a ni Ronie Obiado ken 2-tawen nga apoko na a ni Intoy, bayat a nasalakan ti tallo pay, kadua ti nagannak ken lola ti ubing. Nupaykasta, saan pay a natunton ti ayan ti asawa ni Obiado kalpasan ti insidente.

Iti Negros Occidental, killaat lattan a pinaltogan ken pinatay dagiti soldado ti 79th IB ti agassawa a mannalon nga da Christian Job Vargas ken Mailyn Salgado idi Oktubre 17 iti Sityo Nabalas 1, Barangay Canlusong, E.B. Magalona. Naulila dagiti agassawa ti annak da nga edad lima, maysa tawen ken lima a bulan.

Iti Abra, pinatay ti 77th IB ti 68-tawen a mannalon a ni Antonio Diwayan Agliwan a maymaysa nga agnanaed iti Sityo Talipugo, Barangay Buneg, Lacub, idi Oktubre 13 ti malem. Inrupir dagiti kabagyan ti biktima a sibilyan ni Agliwan.

Kabayatan na, inlawag ti NPA-Abra a sibilyan ken saan a Nalabbaga a mannakigubat ti napapatay dagiti soldado idi Oktubre 3 iti nagbeddengan ti Barangay Gacab, Malibcong ken Barangay Ableg, Daguioman iti Abra. Maikaniwas iti ibagbaga ti 24th IB, awan ti napasamak nga engkwentro ditoy.

Panag-aresto. Inaresto dagiti pwersa ti militar ti 70-tawen a ni Dolores Rapsing-Belibit, kabsat ti martir a ni Jose Rapsing, iti Barangay Bolo, Masbate City, Masbate idi Setyembre 30. Sinampaan isuna kadagiti kaso ti panagpatay, gandat a panagpatay, ken dadduma pay a krimen a segun kadagiti kabagyan ket pasig nga ar-aramid dagiti militar.

Iligal met nga inaresto dagiti pwersa ti estado da Nilo Mabuti Almoradie, 58 tawen, ken Melanie Tupas Amor iti Barangay Pina, San Jacinto idi Oktubre 2 kadagiti kaso a panagpatay. Ni Almoradie ket awan-basaran a pinabasol a “3rd most wanted” iti ili ti San Jacinto.

Inaresto iti saan pay nalawag a kaso ti organisador dagiti katutubo a ni Reymart Moneda idi Oktubre 16 iti Barangay Magsaysay, Infanta, Quezon dagiti soldado ti 1st IB. Iti agdama ket nakabalud isuna iti istasyon ti pulis iti Infanta.

Panangrames. Dua a babbai iti Bongabong, Oriental Mindoro ti rinames dagiti soldado ti 203rd IBde ken CAFGU idi Agosto, segun iti report ti National Democratic Front (NDF)-Mindoro idi Oktubre 8.

Rinames dagiti elemento ti CAFGU ni “Rose” idi Agosto 28 iti Barangay Hagan. Ti met maikadua a biktima a ni “Ana” ket maysa a katutubo a residente ti Barangay Lisap.

Panagbomba. Agtultuloy a nagkanyon iti uneg ti maysa lawas manipud Setyembre 23 aginggana Setyembre 29 ti 87th IB iti Barangay San Nicolas ken Aguingayan iti San Jose de Buan, Western Samar. Idi Setyembre 23, saan a bumaba iti 17 kanyon ti pinabettak daytoy manipud alas-8 ti rabii aginggana alas-4 ti parbangon kabigatan na.

Panambugbog. Idi Oktubre 3, binugbog dagiti elemento ti 203rd IBde ti tallo a Mangyan-Buhid a residente ti Barangay Manoot, Rizal, Occidental Mindoro. Iligal met nga inaresto dagiti pasista ni Nano Dam-in.

Panangliplipit. Binekkel, inggusugos ti rupa iti daga, ken pinangtaan a papatayen dagiti soldado ti 2nd IB ti agdama a barangay tanod ken kumankandidato a kagawad iti Barangay Matubinao, Cataingan, Masbate a ni Ariel Urag idi Oktubre 12. Rinaut ti 15 soldado ti balay tapno pabutngan ni Urag ken pasuroten kadagiti baun da.

Idi Oktubre 12, impatulod ti Department of Justice ti maysa a subpoena wenno panangpaayab kada Jonila Castro ken Jhed Tamano tapno sangoen dagiti kaso a perjury ken slander nga insampa ti 70th IB. Mamati dagiti grupo iti karbengan-tao a dagitoy ket pananglipit ken bales kalpasan nga ibutaktak ti dua ti inaramid a panagdukot, tortyur ken iligal a panangibalud ti militar kadakuada.

Pinangtaan ni sigud a presidente Rodrigo Duterte ti biag ni Deputy Minority Leader ken ACT Rep. France Castro iti maysa a programa iti telebisyon idi Oktubre 11. Kuna ni Duterte, kas kenni Castro ti target ti intelligence fund ken “rumbeng a papatayen.”

Iti Camarines Norte, nai-surat ti innem a kaso ti intimidasyon ken pammutbuteng kadagiti ili ti Labo ken Jose Panganiban iti nagbaetan ti Agosto 11 ken Oktubre 3. Sumagmamano kadagiti mannalon a biktima ket nakapadas iti tortyur.

Panagpaltog. Idi Setyembre 27, maysa a grupo dagiti katutubo ti ginandat nga imasaker idi pinaltupaltogan dagiti soldado ti 9th IB iti Sityo Mapatong, Barangay Malaya iti ili ti Labo. Kalpasan daytoy, maysa a katribu da ti tiniliw ken inbalud.

Pinaltupaltogan met ti 62nd IB ti komunidad iti Sityo Kapaklan, Barangay Santol, Binalbagan, Negros Occidental idi Oktubre 6.