Ginasut-ribu nga umili iti naduma-duma a pagilian ti nagturong kadagiti kalsada kas suporta iti pannakidangadang ti umili a Palestino para iti pudno a wayawaya ken laban iti gerra a henosidyo ti Israel. Nagwaras dagiti tignay protesta iti 40 pagilian ken iti naduma-duma a syudad kadagitoy a pagilian.

Pinaawan-kinaagpayso na dagiti nag-rali ti sistematiko a disimpormasyon nga ipaspasaknap ti Israel, US ken dagiti pagilian a sumupsuporta iti henosidyo a dumaldalan iti higante nga imperyalista a makinarya iti masmidya ken pati iti social media. Kunada, saan a “gerra” wenno “risiris ti Israel-Hamas” ti mapaspasamak iti Gaza ngem ketdi agdadata nga henosidyo.

Iti Pilipinas, rinib-ribu nga umili a Moro ti nagprotesta kadagiti syudad ti Marawi ken South Cotabato. Tinakderan da a makipagkaykaysa da kadagiti umili a Palestino. Kinastigo ti sumagmamano a lider-Moro ti panangsuporta ni Ferdinand Marcos Jr iti Israel numan pay rinib-ribun ti pinapatay daytoy a Palestino. Nagirussuat met kadagiti protesta kas pannakikaykaysa dagiti nailian-demokratiko nga organisasyon iti Quezon City.

Idi Oktubre 13, nairussuat dagiti tignay protesta iti Jordan, Lebanon, Syria, Iran, Iraq, Pakistan ken Egypt iti naawagan a “Biernes ti Al Aqsa Flood.” Maitudtuding a sagrado ti Al Aqsa saan laeng kadagiti umili a Palestino ngem ketdi kadagiti dadduma pay nga Arabo ken dagiti mammati iti Islam.

Iti US ken Canada, gimmil-ayab dagiti protesta kadagiti mayor a syudad, karaman ti New York a linaukan dagiti Jew ken biktima dagiti henosidyo dagiti Nazi. Idi Oktubre 19, sinerrek dagiti nag-rali ti pasdek ti Kongreso ti US tapno iwaragawag ti panampasardeng iti henosidyo ken panangiyaramid ti sispayr. Kagiddan ti protesta iti panagbisita ti presidente ti US a ni Joseph Biden iti Israel tapno ipakita ti todo-todo a suporta ti rehimen na kenni Benjamin Netanyahu, daulo ti Zionista a rehimen.

Iti United Kingdom ken Australia, rinib-ribu ti simmurot kadagiti vigil ken protesta kadagiti kangrunaan a syudad. Iti France, 150,000 ti limmaok iti inawagan a “Day of Rage” iti bangir ti panangiparit ti gobyerno ditoy. Naaddaan kadagiti kapada a panagtignay iti UK, Germany, The Netherlands, Italy, Spain, Greece, Switzerland, Ireland, Iceland ken Norway.

Iti Malaysia, 1,000 ti nagrali ken nagpuor ti dua nga effigy nga adda nakabitin a bandera ti Israel. Naaddaan met dagiti panagtignay iti Yemen, Indonesia, Bangladesh, Japan ken Sri Lanka. Iti South America, nakimaymaysa ti umili iti Mexico, Brazil, Uruguay ken Venezuela. Kabayatan na, pinatakyas ti Colombia ti ambasador ti Israel iti pagilian da. Kuna ti presidente daytoy a ni Gustavo Petro, ti panagraut ti Israel iti Gaza ket kapada ti henosidyo dagiti Nazi kadagiti Jew.