Naballigi nga insayangkat ti National Democratic Front of the Philippines (NDFP) ti kaunnaan a Sangalubongan a Kumperensya a Teoretikal iti maysa a pagilian iti Europe idi Oktubre 14-15. Dinar-ayan daytoy ti 139 delegado manipud iti naduma-duma a partido a proletaryo-sosyalista, anti-imperyalista ken demokratiko a mangibagbagi kadagiti umili ti lubong manipud iti Belgium, Canada, China, Germany, United Kingdom, India, Italy, Turkey, Kurdistan, The Netherlands, North Korea, Pilipinas, Russia, South Korea ken US.

Inrussuat ti kumperensya iti tengnga ti saan-a-malapdan a krisis ken umir-irteng a kontradiksyon iti nagbaetan dagiti imperyalista a pagilian. Babaen kadagiti pablaak ken presentasyon manipud iti naduma-duma a partido a Marxista-Leninista, dagiti partido nga agirusrussuat ti Maoista a gubat ti umili, ken anti-imperyalista nga organisasyon manipud iti naduma-duma a pagilian, kangrunaan a nagpapatangan ti makuna a kumperensya ti teoretikal a balangkas ti saan-a-maliklikan a gerra iti nagbaetan dagiti imperyalista a pagilian ken dagiti tulbek a nalatak a pasamak kadagiti inter-imperyalista a risiris. Nagpatangan met ditoy ti panagbaringkuas dagiti mangmangged ken umili iti naduma-duma a dissu ti lubong, ken nu ania ti usto nga aktitud ken panagamiris ti sangalubongan a proletaryado iti tengnga ti agdama a sangalubongan a kasasaad.

Iti mayor a pablaak ti Komite Sentral ti Partido Komunista ti Pilipinas, inlawag daytoy ti agdama a balanse ti bileg iti nagbaetan dagiti imperyalista a pagilian. Dinakamat daytoy ti PKP a ramut ti lalo pay a panagirteng ti inter-imperyalista a risiris iti lubong ti umir-irteng nga agresyon ti US iti panaggandat daytoy nga irupir ti solo a kontrol iti agdama a multipolar nga urnos ti lubong.

Inlawag met laeng ti Komite Sentral ti PKP a ti gerra iti Ukraine iti kangrunaan ket proxy war ti US-NATO laban iti Russia, kasta met dagiti dandani-bumtak a pangta ti gerra iti Asia. Us-usaren ti US ti Taiwan ken Korea, kasta met ti Pilipinas ken dadduma pay a pagilian iti inawagan daytoy a “First Island Chain” tapno palawlawan ken limitaran ti bileg iti ekonomya ken militar ti China. Segun iti PKP, ti nailian-demokratiko a rebolusyon iti Pilipinas babaen iti naunday a gubat ti umili ken dadduma pay a porma ti panagmobilisa iti nalawa nga umili a Pilipino ket ti naisangsangayan a kontribusyon daytoy iti pannakidangadang laban iti inter-imperyalista a gerra. Ti panagirussuat ti armado a pannakidangadang laban iti imperyalismo a US ken dagiti papet daytoy iti Pilipinas ket agserserbi tapno lapdan dagiti plano ti US a mangdurog ken mangpaputok ti armado a risiris iti rehiyon ti Asia.

Laksid iti PKP, karaman iti nangibingay kadagiti presentasyon da ti Communist Party of India (Maoist), Communist Party of Turkey Marxist-Leninist (TKP-ML), Party of the Committees to Support Resistance for Communism (CARC-Italy), Freedom Road Socialist Organization-USA, Korean Committee for Solidarity with the World People, Russian Communist Workers Party, (New) Communist Party of Canada, Kurdistan National Congress (KNK), Revolutionaire Eenheid (Netherlands), Communist Party of Great Britain (Marxist-Leninist), Communist Party of Belgium, People’s Democratic Party (South Korea), Marxistisch-Leninistiche Partei Deutschlands (Germany) ken dagiti kadua ken eksperto manipud China.

Inlawag met laeng iti kumperensya ti agtultuloy a panagsakop ken panagbomba ti Israel iti Palestine iti basbas ken suporta ti US.

Nagbalin a sustantibo ken nabaknang dagiti diskusyon iti kumperensya ken nagserbi daytoy a gundaway para kadagiti naduma-duma a lumablaban nga umili tapno makapagsinnukat kadagiti ideya ken praktikal a kapadasan. Kamaudianan na, rimmingbaw ti kapanunotan ken komitment ti tunggal delegado iti Marxista a pannirigan maipanggep iti naisangsangayan a papel ti sangalubungan a proletaryado a baliwan ti lubong. Kasta met, lalo pay a napabaknang dagiti panagamiris ken pannakaawat iti teorya ken praktika ni Kadua Lenin maipanggep iti imperyalismo, ni Kadua Mao maipanggep iti panagirussuat ti gubat ti umili kadagiti pagilian a malapyudal ken malakolonyal, ken ti agdama a kinapateg ti papel dagiti tignayan para iti nailian a wayawaya iti panagpapigsa ti sangalubongan a tignayan a sosyalista ken anti-imperyalista.

Iti panaglippas ti dua aldaw a kumperensya, nagkaykaysa iti pannakaawat dagiti delegado iti teoretikal a bala-bala ken panagamiris iti agdama a kasasaad ti lubong. Namnamaen nga agserbi daytoy tapno magun-od ti nangatngato a tukad ti panagkaykaysa iti intar ti maysa a nalawa a nagkaykaysa a prente iti uneg ti sangalubongan a tignayan a proletaryo-sosyalista ken anti-imperyalista kas panagsagana iti masangwanan a lalo pay a panagsuek ti krisis ti sangalubongan a sistema a kapitalista.