Ginatos ka linibo nga pumuluyo sa nagkalain-lain nga pungsod ang naghagunos sa mga karsada bilang suporta sa paghimakas sang pumuluyong Palestino para sa matuod nga kahilwayan kag pakigbato sa gyerang henosidyo sang Israel. Naglapta ang mga hublag protesta sa 40 ka pungsod sa nagkalain-lain nga syudad sa sulod sang mga pungsod nga ini.

Ginpamatukan sang mga ralyista ang sistematiko nga disimpormasyon nga ginapalapnag sang Israel, US kag mga pungsod nga nagasuporta sa henosidyo nga naga-usoy sa dalagko nga imperyalistang makinarya sa masmidya kag pati sa social media. Sandig sa ila, indi “gyera” ukon “kinagamo sang Israel-Hamas” ang nagakahitabo sa Gaza kundi lantad nga henosidyo.

Sa Pilipinas, linibo ka pumuluyong Moro ang nagprotesta sa mga syudad sang Marawi kag South Cotabato. Nanindugan sila sa pumuluyong Palestino. Ginkastigo sang pila ka lider-Moro ang pagsuporta ni Ferdinand Marcos Jr sa Israel bisan pa nga linibo na ang ginpatay sini nga Palestino. Naglunsar man sang protesta bilang pagpakig-ugyon ang mga pungsodnon-demokratiko nga organisasyon sa Quezon City.

Sadtong Oktubre 13, ginlunsar ang mga hublag protesta sa Jordan, Lebanon, Syria, Iran, Iraq, Pakistan kag Egypt sa gintawag nga “Byernes sang Al-Aqsa Flood.” Ginakabig nga sagrado ang Al Aqsa indi lang sang pumuluyong Palestino kundi sa iban pa nga mga Arabo kag mga nagatuo sa Islam.

Sa US kag Canada, nagdilaab ang mga protesta sa mayor nga mga syudad, kabahin sa New York nga gintambungan sang mga Jew kag biktima sang mga henosidyo sang mga Nazi. Sadtong Oktubre 19, ginsulod sang mga raliyista ang edipisyo sang Kongreso sang US agud ipanawagan ang pagpa-untat sa henosidyo kag pagpatigayon sang untat-lupok. Kadungan ang protesta sa pagbisita sang presidente sang US nga si Joseph Biden sa Israel agud ipakita ang todo nga suporta sang iya nga rehimen kag Benjamin Netanyahu, pamunuan sang Zionista nga rehimen.

Sa United Kingdom kag Australia, linibo ang nag-upod sa mga vigil kag protesta sa mga nagapanguna nga syudad. Sa France, 150,000 ang nakigbahin sa gintawag nga “Day of Rage” sa pihak sang pagbawal sang gubyerno diri. Naghiwat sang kasubong nga mga hublag sa UK, Germany, The Netherlands, Italy, Spain, Greece, Switzerland, Ireland, Iceland kag Norway.

Sa Malaysia, 1,000 ang nagrali kag nagsunog sang duha ka effigy nga may nasab-it nga bandera sang Israel. Nagtigayon man sang mga hublag sa Yemen, Indonesia, Bangladesh, Japan kag Sri Lanka.

Sa South America, nakig-ugyon ang pumuluyo sa Mexico, Brazil, Uruguay kag Venezuela. Samtang, ginpahalin sang Colombia ang ambassador sang Israel sa ila nga pungsod. Base sa presidente sini nga si Gustavo Petro, ang pagpang-atake sang Israel sa Gaza ang kapareho sang henosidyo sang mga Nazi sa mga Jew.