Ginlunsar sang mga pungsodnon-demokratiko nga organisasyon, sa pagpanguna sang mga hugpong sang mamumugon kag anakbalhas, ang tatlo ka adlaw nga pagpasidungog para kay Jude Thaddeus Fernandez ukon Ka Jude, beterano nga organisador sang Kilusang Mayo Uno (KMU), sa University of the Philippines (UP)-Diliman sadtong Oktubre 10 tubtob Oktubre 12.

Ginpatay si Fernandez sang mga pwersa sang estado sadtong Setyembre 29 sa iya ginadayunan nga balay sa Rizal. Ginpagwa siya nga nagbato, bagay nga ginlalis sang fact-finding mission nga nagpadulong sa lugar nga nahitabuan.

Ginpa-antus pa sang mga pulis ang pamilya nga mabawi ang lawas. Ginpanginwala nila nga si Ka Jude ang ila ginpatay, kundi isa ka “Oscar Dizon” nga amo ang nakabutang nga pangalan sa ginahambal nga mandamyento nga ginserbe sa iya.

Dinekada na nga organisador sang masang anakbalhas si Fernandez. Nagsugod siya nga maghulag sadtong 1975 samtang estudyante pa siya sa UP-Los Baños. Kabahin siya sa mga nanguna sa kampanya para sa pagbalik sang demokratiko nga konseho sang estudyante, sang hilway nga mga pamantalaan pangkampus, representasyon sang mga estudyante sa UP Board of Regents kag pagbalik sang Philippine History and Institution sa kurikulum.

Upod ang iban nga pamatan-on halin sa unibersidad, nagpatapo si Ka Jude sa kahublagan sang sahing mamumugon kag mamumugon sa uma sa panahon sang laye militar. Matingkad ang nangin papel niya sa pag-organisa sang mga mamumugon sang Sunripe Desiccated Coconut Industry sa Magdalena, Laguna, nga nanguna sa pagbandera sang matuod, makahas kag makipungsodnon nga unyonismo kag militante nga mga paghimakas masa sa amo nga panahon.

Ginkilala man sang Partido Komunista ng Pilipinas ang dako nga amot ni Ka Jude bilang proletaryong rebolusyonaryo sa pagsulong sang mga paghimakas masa, amo man sang armadong rebolusyonaryong kahublagan ilabi na sa Southern Tagalog, pati na sa Central Luzon. Ang manggaran niya nga inagihan sa pag-organisa kag pagpahulag ang nangin ubay sa padayon nga pagpabaskog sang kahublagan masa sa nagkalain-lain nga rehiyon kag sektor.