Dapat lubos nga pakamalauton ang ginapatigayon nga gyerang henosidyo sang US-Israel batuk sa pumuluyong Palestinian. Sa nagligad nga duha ka semana, ilabi nga ginpabaskog ang ini nga gyera sa porma sang wala untat nga pagpamomba sa Gaza sa tuyo nga dugmukon ini kag palayason ang mga nagapuyo didto.

Gindala sang estado sang Israel sa panibag-o nga halintang sang kabuktutan ang pila na ka dekada nga henosidyo agud nga lubos nga tabugon ang mga Palestinian halin sa ila dutang gintubuan.

Pila ka libo nga bomba ang ginhulog sa Gaza, isa ka parsela sang duta nga may pinakadamul nga popoulasyon sa bug-os nga kalibutan. Wala sang pag-ulikid nga gin-igo sang pagpamomba ang populasyon kag imprastrakturang sibilyan, kabahin ang mga balay kag apartment, mga eskwelahan, ospital, simbahan, kag pasilidad pang-ikaayong lawas, mga edipisyo komersyal kag mga talatapan sang negosyo kag midya. Ginwasak sang pagpamomba ang mga imprastraktura para sa tubig kag kuryente kag ginaipit ang suplay sang pagkaon kag lana.

Sa sulod sang duha ka semana, indi magnubo sa 4,100 ka Palestinian sa Gaza ang napatay, kabahin ang masobra 1,400 ka kabataan, samtang masobra milyon ang nawad-an sang puluy-an kag nag-agum sang gutom kag kahangawa. Pinakamakasiligni ang masaker sa masobra 600 ka Palestinian sa ginpatigayon nga pagpamomba sang Israel sa isa ka ospital sa na-aminhan nga bahin sang Gaza kung sa diin linibo ang nakapasilong kag nagapabulong.

Masobra duha ka milyon nga Palestinian ang nagaginutok sa Gaza, isa ka magamay nga suok sang duta sa nasidlakan nga baybayon sang Mediterranean Sea. Ginpalibutan ini sang Israel sang matag-as nga kudal, kag tanan nga paggwa-sulod diri ang kontrolado sang Israel Defense Force. Sobra ukon kulang tatlo ka milyon naman ka Palestinian ang nagapuyo sa mga komunidad sa West Bank, isa ka teritoryo nga yara sa kontrol sang mga pwersang Israel, katimbang ang Palestinian Authority nga gintukod sa dulot sang mga kasugtanan nga ginduso sang US.

Ang tampalasan nga pagpamomba sa Gaza ang nagpahanumdom sa mapintas nga kasaysayan sang pagpamigos nga naagom sang mga Palestinian. Ang duta sang Palestine ang gin-agaw sang kolonyal nga gahum sang United Kingdom sadtong 1917. Sugod sang gindeklarar sang UK sadto nga tuig ang plano nga magtukod sang “pungsod sang mga Hudyo” sa duta sang Palestine, wala untat nga gin-angkon ang pagpamigos kag pagpalayas sa mga Palestinian. Ginlunsar ini sa ngalan sang Zionismo, ang upisyal nga ideolohiya sang estado sang Israel, nga natuon sa pagpuo sang pumuluyong Palestinian. Nagtayog ang pagpamigos nga ini sadtong 1948 sa gintawag nga Al Nakba ukon Ang Katalagman.

Dapat ubos-kusog nga padlason ang imperyalismong US sa direkta nga pagsuporta sini sa henosidyo nga ginapatigayon sang gubyernong Israel. Ginapangapinan pa sang US sa dalagko nga krimen kag kalapasan ang Israel sa internasyunal nga makitawhanon nga laye. Plano pa sang gubyernong US nga hatagan sang $10 bilyon ang Zionistang Israel, mas dako kaysa sa tuigan nga $7 bilyon nga ginahatag sini nga ayuda militar, nga pinakadako sa bug-os nga kalibutan, kabaylo sang pagserbe nga balwarte sang imperyalismong US sa Middle East.

Bilang pumuluyo nga nag-agum sang kolonyal nga pagpanakop kag pagpaamigos sa sulod sang pila ka gatos ka tuig, lubos nga nasayod sang pumuluyong Pilipino ang gaka-aguman sang pumuluyong Palestinian kag ang handum nila para ibalik ang matuod nga kahilwayan sa ila dutang gintubuan.

Ang paghimakas sang pumuluyong Palestinian kag pumuluyong Pilipino ang gina-isa man sang pagbato sa komun nga kaaway- ang imperyalismong US, ang gahum sa likod sang pareho nga gina-aguman nga kabuktutan kag pigos nga kahimtangan. Pareho nga nakasandig sa US kag sunud-sunod sa amo nga imperyalista ang estado sang Israel nga nagapamigos sa mga Palestinian, kag ang reaksyunaryo nga estado sa Pilipinas nga nagapigos sa pumuluyong Pilipino.

Nakapadron sa wala-untat nga pagpamomba sang US sa Afghanistan kag Syria “batuk sa mga terorista” ang ginahimo nga pagpamomba subong sang Israel sa syudad sang Gaza. Sa amo man nakapadron ang ginhimo nga pagdugmok sa Marawi sadtong 2017, kag ang tampalasan nga pagpamomba subong sang AFP sa nagkalain-lain nga bahin sang kabukiran sang Pilipinas. Ang mga kampanya militar halin sa US kag Israel ang tigsuplay sang mga eroplano, bomba, drone kag iban pa nga kagamitan sang AFP sa ginatigayon nga pagpamomba kag armado nga pagpanumpo sa tabon sang “kontra-insurhensya.”

Ang mga armadong opensiba nga ginpangunahan sang grupo nga Hamas sadtong oktobre 7 sa Gaza batuk sa mga pwersa militar sang Israel ang liwat nga pagdilaab sang kaakig sang pumuluyong Paletinian sa gina-agum sini nga wala-untat nga pagpamigos kag pagpang-ipit sa idalom sang Zionista nga estado sang Israel. Ang armado nga pagbato sang mga Palestinian ang gintawag nga “terorismo” sang Israel kag sang US (pati na sang gubyerno ni Marcos, pareho nga ginkundenar sang mga imperyalista ang tanan nga armadong rebolusyonaryong kahublagan sa Pilipinas, India, Turkey kag iban pa nga pungsod. Apang pareho sang ginapakita sa henosidyo batuk sa pumuluyong Palestinian, ang matuod nga terorista amo ang estado sang Israel, nga may lubos nga suporta sang imperyalismong US, ang numero uno nga terorista sa bug-os nga kalibutan. Terorismo sang estado man ang gina-agum sang pumuluyong Pilipino, sa hungod nga pagtarget sang mga armadong pwersa sang estado sa mga indi armado nga pumuluyo agud pahugon sila kag sumpuon ang ila pagbato.

Sa atubang sang gina-agum nga pungsodnon nga pagpamigos sang pumuluyong Palestinian kag pumuluyong Pilipino, pareho sila nga may angkon nga kinamatarung nga mag-uyat sang hinganiban kag usuyon ang banas sang armado nga pagbato. Ang kasaysayan sang paghimakas sang pumuluyong Paletinian, kasubong sa kasaysayan sang paghimakas sang pumuluyong Pilipino para sa pungsodnon nga kahilwayan, ang kasaysayan sang armado nga pagbato. Ginalunsar nila ang inaway sang isa ka gamay kag huyang nga pwersa, batuk sa isa ka dako kag gamhanan nga kusog. Pareho ini nga inaway sang banwa nga bilidhon kag makatarunganon, ginasuportahan sang malapad nga demokratikong kusog sang pumuluyo, kag sigurado nga maga-angkon sang kadalag-an.