Madinalag-on nga ginhiwat sang National Democratic Front of the Philippines (NDFP) ang pinakauna nga Pangkalibutanon nga Kumperensyang Teoritikal sa isa ka pungsod sa Europe sadtong Oktubre 14-15. Nakigbahin diri ang 139 ka tumalambong halin sa nagkalain-lain nga partido nga proletaryo-sosyalista, anti-imperyalista kag demokratiko nga nagatiglawas sa mga pumuluyo sa kalibutan halin sa Belgium, Canada, China, Germany, United Kingdom, India, Italy, Turkey, Kurdistan, The Netherlands, North Korea, Pilipinas, Russia, South Korea kag US.

Ginlunsar ang kumperensya sa tunga sang nagahagunos nga krisis kag nagasingki nga kontradiksyon sa tunga sang mga imperyalistang pungsod. Paagi sa mga pahayag kag presentasyon halin sa nagkalain-lain nga partidong Marxista-Leninista, mga partido nga naglunsar sang Maoista nga inaway banwa, kag anti-imperyalista nga mga organisasyon halin sa nagkalain-lain nga pungsod, nagapanguna nga gintalakay sang nasambit nga kumperensya ang teoritikal nga balayon sang indi-malikawan nga gyera sa tunga sang mga imperyalista nga pungsod kag ang mga yabi nga panghitabo sa mga inter-imperyalista nga kinagamo. Gintalakay man diri ang pag-alsa sang mamumugon kag pumuluyo sa nagkalain-lain nga suok sang kalibutan, kag kung ano ang nagakaangay nga aktitud kag pagtuki sang pangkalibutanon nga proletaryado sa tunga sang nagaluntad nga pangkalibutanon nga kahimtangan.

Sa mayor nga pahayag sang Komite Sentral sang Partido Komunista ng Pilipinas, gin-athag sini ang kasamtangan nga balanse sang gahum sa tunga sang mga imperyalistang pungsod. Gintumod ini sang PKP nga ugat sang ilabi pa ginpasingki nga inter-imperyalista nga banggianay sa kalibutan ang ginpalala nga agresyon sang US sa tuyo sini nga iduso ang solo nga kontrol sa kasamtangan nga multi-polar nga plastar sang kalibutan.

Gin-athag man sang Komite Sentral sang PKP nga ang gyera sa Ukraine sa nagapanguna amo ang proxy war sang US-NATO batuk sa Russia, amo man ang mga nagahana nga pamahog nga gyera sa Asia. Ginagamit sang US ang Taiwan kag Korea, amo man ang Pilipinas kag iban pa nga pungsod sa gintawag sini nga “First Island Chain” agud nga palibutan kag limitahan ang gahum sa ekonomiya kag militar sang China. Sandig sa PKP, ang pungsdonon demokratikong rebolusyon sa Pilipinas paagi sa pangmalawigon inaway banwa kag iban pa nga porma sang pagpahulag sa malapad nga masa sang pumuluyong Pilipino amo ang solo nga kontribusyon sini sa paghimakas batuk sa inter-imperyalista nga gyera. Ang paglunsar sang armado nga paghimakas batuk sa imperyalismong US kag mga papet sini sa Pilipinas ang nagaserbe agud punggan ang mga plano sang US nga magsugod kag magpalupok sang armado nga kinagamo sa rehiyon sang Asia.

Magluwas sa PKP, kabahin sa nakigbahin sang ila nga mga presentasyon ang Communist Party of India (Maoist), Communist Party of Turkey Marxist-Leninist (TKP-ML), Party of the Committees to Support Resistance for Communism (CARC-Italy), Freedom Road Socialist Organization-USA, Korean Committee for Solidarity with the World People, Russian Communist Workers Party, (New) Communist Party of Canada, Kurdistan National Congress (KNK), Revolutionaire Eenheid (Netherlands), Communist Party of Great Britain (Marxist-leninist), Communist party of Belgium, People’s Democratic Party (South Korea), Marxistisch-Leninistiche Partei Deutschlands (Germany) kag mga kaupod kag eksperto halin sa China.

Gintalakay man sang kumperensya ang pagpanakop kag pagpamomba sang Israel sa Palestine sa bendisyon kag suporta sang US.

Nangin sustantibo kag manggaran ang mga diskusyon sa kumperensya kag nagserbe ini nga higayon para sa nagkalain-lain nga nagapakigbato nga pumuluyo agud makabaylohanay sang mga ideya kag praktikal nga inagihan.

Sa ulihi, nangibabaw ang kaisipan kag panindugan sang tagsa ka tumalambong sa Marxista nga panan-awan angot sa bilidhon nga papel sang pangkalibutanon nga proletaryado nga bag-uhon ang kalibutan. Amo man, ilabi pa nagpamanggad ang mga pagtuki kag paghangop sa teorya kag praktika ni Kaupod Lenin angot sa imperyalismo, ni Kaupod Mao angot sa panglunsar sang inaway banwa sa mga pungsod nga malapyudal kag malakolonyal, kag ang kasamtangan nga kamahinungdanon nga papel sang mga kahublagan para sa pungsodnon nga kahilwayan sa pagpabaskog sang pangkalibutanon nga kahublagang sosyalista kag anti-imperyalista.

Sa pagtakop sang duha ka adlaw nga kumperensya, nag-ugyon sa paghangop ang mga tumalambong sa teoritikal nga balayon kag pagtuki sa nagaluntad nga kahimtangan sang kalibutan. Ginalauman nga magaserbe ini agud maangkon ang mas taas nga halintang sang pag-isa sa kubay sang isa ka malaparan nga nagahiliugyon nga prente sa sulod sang pangkalibutanon nga kahublagang proletaryo-sosyalista kag anti-imperyalista bilang paghanda sa nagahana nga mas sobra pa nga paghugpaas sang krisis sang pangkalibutanon nga sistemang kapitalista.