Nakibot ang kalibutan sang ginlunsar sang Izz ad-Din al-Qassam Brigades, ang armado nga pakpak sang grupo nga Hamas sang Palestine, ang makahas nga armado nga aksyon nga nagbuka sa terorismo kag hugot nga kontrol sang Israel sa Gaza. Nagsugod ang aksyon nga gintawag Al-Aqsa Flood sadtong kaagahon sang Oktubre 7 sa pagbuya sang mga misayl nga nagtarget sa mga base kag pwersa militar sang Israel.

Ginsundan ini sang paglusob sang linibo ka armado nga Palestino nga nagbuslot sa kudal nga bilangguan nga ginpalibot sang Israel sa Gaza. Madasig nila nga nalutos ang mga pwersa nga Israeli kag bulto nga pwersa sini ang nabihag sa inaway.

Gin-athag sang Hamas nga una, ang Al-Aqsa Flood ang isa ka depensiba nga armadong aksyon nga sabat sa 75-tuig na nga pag-antus sang ila pumuluyo sa idalom sang brutal nga pagpanakop sang Israel. Ikaduha, nagasunod ini sa mga pagsulundan sa inaway kung sa diin nagapanguna nga target amo ang mga armado nga pwersa sang Israeli kag ginhatagan sini sang importansya ang kaluwasan sang mga sibilyan.

“Sa nagligad nga 75 ka tuig, ginhidlaw ang pumuluyong Paletinian sa kahilwayan kag kaugalingon nga kabubut-on,” pahayag sang pamunuan sang Hamas sa isa ka nakabidyo nga pahayag. Ang sandigan nga kinamatarung nga ini ang ginsablagan sang okupasyon sang Israel kag kainutil sang internasyunal nga komunidad nga panindugan ang obligasyon sini sandig sa masyado kadamo nga resolusyon sa United nations para maangkon ang pungsodnon nga kinamatarung sang Palestine.

“Wala sang makapamalibad sa kinamatarung sang sin-o man nga pumuluyo nga ginsakop nga batuan ang nagapanakop paagi sa anuman kag tanan nga pamaagi, kabahin ang armado nga pagbato,” base sa Hamas. Dugang sini, pasulit-sulit na ini nga nagpaandam sa pag-ibwal sang kaakig sang mga Palestino tungod sa wala puas kag sobra-sobra nga pagpamintas sang Israel. Kabahin diri ang sulit-sulit nga pagpanglusob sang mga pwersang Israeli sa moske sang Al-Aqsa, isa ka sagrado nga lugar para sa mga Palestino, okupasyon sa nabilin nila nga mga teritoryo sa Jerusalem, kag pagpamintas sa mga bilanggong pulitikal. Ginhatag man nga basehan sang Hamas ang wala-pugong nga pagpulbos sang Israel sa Gaza sa nagligad nga 17 ka tuig kag ang pagkudal sa syudad agud nga prisohon sa ginatawag nga “pinakadako nga wala atop nga bilangguan” ang minilyon ka Palestino.

“Ang dungganon nga pagbato sang mga Palestino ang nagbukas sang bag-o nga hugna sang inaway para sa dignidad,” deklara naman sang Masar Badil (Palestinian Alternative Revolutionary Path Movement.)

Nagpanawagan naman ang Popular Front for the Liberation of Palestine sa tanan nga mga Palestino sa West Bank, Al Quds kag sa mga teritoryo nga ginsakop sang Israel nga “maghulag kag padilaabon ang mga kumprehensibo nga intifada (pag-alsa sang masa) sa atubang sang kriminal nga kaaway kag tagasunod sini nga mga settler” bilang sabat sa pagmasaker sang Israel.

Brutal nga okupasyon

Mapintas nga ginpanas ang pungsod Palestine sadtong 1948 sa gintawag nga Al Nakba (Ang katalagman) kadungan sang pagtukod sang estado sang Israel. Ginatantya nga 500 ka komunidad ang ginwasak, 15,000 Palestino ang ginpatay kag 750,000 ang ginpalayas sang sadto mga Zionista nga paramilitar. Ginsakop sini ang 78% sang sadto pungsod Palestine, kag solo nga ang hamulag nga kihad sa West Bank kag Gaza ang ginbilin sa mga Palestino.

Sa nagsunod nga mga dekada, linibo pa ka mga Palestino ang ginpatay kag minilyon ang ginpalayas sa wala kabulusgan nga pagpang-agaw sang duta kag rekurso sang Zionista nga rehimen. Naglab-ot sa 250 “settlement” ang iligal nga gintukod sini sa West Bank kag East Jerusalem. Sa East Jerusalem lang, naglab-ot sa 100,000 ektarya ang gin-agaw sang Israel.

Ginhugakom sang Zionista nga rehimen ang manggad kag rekurso kag tagsa ka aspeto sang kabuhi sang Palestino, ilabi na sa West bank. Kakunsabo ang Palestenian Authority nga gintukod kag ginpondohan sang Israel kag US, ginpwesto sini ang pasista nga makinarya agud sumpuonang tanan nga pagbato sang pumuluyong Palestino kag amat-amat nga panason ang ila lahi. Magluwas sa adlaw-adlaw nga pagpamigos kag pagpamintas, indi magnubo sa apat ka mayor nga kampanyang militar ang ginlunsar sini sa Gaza sugod sadtong 2007 sa tuyo nga paludhon kag paslawon ang pagbato sang pumuluyo diri.