Ginpatay sang mga pwersa sang Armed Forces of the Philippines (AFP) sa tatlo ka hamulag nga insidente ang isa ka 2 ka tuig nga bata kag lima ka sibilyan sa Negros Occidental, Abra kag Western Samar sa nagligad nga mga semana. Sa mga insedente nga ini, ginpagwa sang AFP nga mga hangaway sang Bagong Hukbong Bayan (BHB) ang mga biktima agud nga taguon ang ila krimen.

Sa Western Samar, ginpaulanan sang bala sang mga suldado sang 63rd IB ang balay sang pamilya Obiado sa Sityo Salvacion, Barangay San Nicolas, San Jose de Buan sadtong Setyembre 25. Gilayon nga napatay sa pagpaniro ang mangunguma nga si Ronie Obiado kag 2 ka tuig niya nga apo nga si Intoy, samtang nakaluwas ang tatlo pa, upod ang ginikanan kag lola sang bata. Amo pa man, wala pa nahibaluan ang nahamtangan sang asawa ni Obiado pagkatapos sang insedente.

Sa Negros Occidental, basta na lang nga gintiro kag ginpatay sang mga suldado sang 79th IB ang mag-asawa nga sila ni Christian Job Vargas kag Mailyn Salgado sadtong Oktubre 17 sa Sityo Nabalas 1, Barangay Canlusong, E.B. Magalona.

Na-ilo sang mag-asawa ang ila mga kabataan nga may edad lima kag isa ka tuig lima ka bulan.

Sa Abra, ginpatay sang 77th IB ang 68-anyos nga mangunguma nga si Antonio Diwayan Agliwan nga naga-isahanon nga nagapuyo sa Sityo Talipugo, Barangay Buneg, Lacub, sadtong Oktubre 13 sang hapon. Ginaduso sang mga himata sang biktima nga sibilyan si Agliwan.

Samtang, gin-athag sang BHB-Abra nga sibilyan kag indi Pulang hangaway ang napatay sang mga suldado sadtong Oktubre 3 sa dulunan sang Barangay Gacab, Malibcong kag Barangay Ableg, Daguioman sa Abra. Tuhay sa ginhambal sang 24th IB, wala sang may nahitabo nga engkwentro diri.

Pag-aresto. Gin-aresto sang mga pwersa militar ang 70-anyos nga si Dolores Rapsing-Belibit, utod sang martir nga si Jose Rapsing, sa Barangay Bolo, Masbate City, Masbate sadtong Setyembre 30. Ginpasakaan siya sang mga kaso sang pagpatay, tuyo nga pagpatay, kag iban pa nga krimen nga sandig sa mga himata puro himu-himo sang militar.

Iligal man nga gin-aresto sang mga pwersa sang estado sila ni Nilo Mabuti Almoradie, 58 anyos, kag Melanie Tupas Amor sa Barangay Piña, San Jacinto sadtong Oktubre 2 sa mga kaso nga pagpatay. Si Almoradie ang wala basehan nga ginpasibangdan nga “3rd most wanted” sa banwa sang San Jacinto.

Gin-aresto sa indi maathag nga mga kaso ang organisador sang mga tumandok nga si Reymart Moneda sadtong Oktubre 16 sa Barangay Magsaysay, Infanta, Quezon sang mga suldado sang 1st IB. Kasamtangan siya nga nadetine sa istasyon sang pulis sa Infanta.

Pagpanglugos. Duha ka kababainhan sang Bongabong, Oriental Mindoro ang ginlugos sang mga suldado sang 203rd IBde kag CAFGU sadtong Agosto, sandig sa report sang National Democratic Front (NDF)-Mindoro sadtong Oktubre 8.

Ginlugos si “Rose” sang mga elemento sang CAFGU sadtong Agosto 28 sa Barangay Hagan. Ang ikaduha nga biktima naman nga si “Ana” ang isa ka tumandok nga residente sang Barangay Lisap.

Pagpamomba. Padayon nga nanganyon sa sulod sang isa ka semana halin Setyembre 23 tubtob Setyembre 29 ng 87th IB sa San Nicolas kag Aguingayan sa San Jose de Buan, Western Samar. Sadtong setyembre 23, indi magnubo sa 17 ka kanyon ang ginpalupok sini halin alas-8 sang gab-e tubtob alas-4 sang kaagahon pagka bwas.

Pagpangastigo. Sadtong Oktubre 3, ginkastigo sang mga elemento sang 203rd IBde ang tatlo ka Mangyan-Buhid nga mga residente sang Barangay Manoot, Rizal, Occidental Mindoro. Iligal man nga gindakop sang mga pasista si Nano Dam-in.

Pagpang-ipit. Ginkuga, ginhaplak ang nawong sa duta, kag ginpaandaman nga pagapatyon sang mga suldado sang 2nd IB ang kasamtangan nga barangay tanod kag nagapadalagan nga kagawad sa Barangay Matubinao, Cataingan, Masbate nga si Ariel Urag sadtong Oktubre 12. Ginlusob sang 15 ka suldado ang balay agud pahugon si Urag kag pasundon sa ila mga mando.

Sadtong Oktubre 12, ginpadala sang Department of Justice ang isa ka subpoena ukon pagpatawag sa ila ni Jonila Castro kag Jhed Tamano agud nga atubangon ang mga kaso nga perjury kag slander nga ginpasaka sang 70th IB. Nagapati ang mga grupo sa tawhanon nga kinamatarung nga ang mga ini ang pagpang-ipit kag pagpanimalos pagkatapos ginbuyagyag sang duha ang ginhimo nga pag-abdak, tortyur kag iligal nga detensyon sang militar sa ila.

Ginpaandaman ni anay presidente Rodrigo Duterte ang kabuhi ni Deputy Minority Leader kag ACT Teachers Rep. France Castro sa isa ka programa sa telebisyon sadtong Oktubre 11. Base kay Duterte, mga kasubong ni Castro ang target sang intelligence fund kag “dapat nga patyon.”

Sa Camarines Norte, nalista ang anom ka kaso sang intimidasyon kag pagpamahog sa mga banwa sang Labo kag Jose Panganiban sa tunga-tunga sang Agosto 11 kag Oktubre 3. Ang pila sa mga mngunguma nga biktima ang nakaagum sang tortyur.

Pagpaniro. Sadtong Setyembre 27, isa ka grupo sang mga tumandok ang tuyo nga imasaker sang ginpaniro sang mga suldado sang 9th IB sa Sityo Mapatong, Barangay Malaya sa banwa sang Labo. Pagkatapos sini, isa ka katribu nila ang gindakop kag ginbilanggo.

Ginpaniro man sang 62nd IB ang komunidad sa Sityo Kapaklan, Barangay Santol, Binalbagan, Negros Occidental sadtong Oktubre 6.