Nahikyad na sa publiko ang dugay nang nagbukalbukal nga bangi tali sa mga Marcos, Arroyo ug Duterte sa sunud-sunod nga atake ug kontra-atake sa mga ginsakpan niini. Labaw nga migrabe ang maong lantugiay taliwala sa krisis sa ekonomiya ug tungod kay dili na mabusog o matagbaw ang tanan sa pagbahin-bahin nila sa bahandi, gahum ug pribilehiyo sa estado.

Labing tataw ang bangi tali sa lider sa Kongreso nga si Martin Romualdez ug bise presidente nga si Sara Duterte. Gisakyan ni Romualdez ang lapad ug hugot nga pagbatikos sa katawhan sa confidential and intelligence funds (CIF) ug pagtangtang niini sa badyet sa 2024 ni Duterte isip bise-presidente ug kalihim sa Department of Education. Miulbo usab ang gubat sa pulong sa kampo ni Romualdez ug kanhing presidente nga si Rodrigo Duterte human gihulga sa naulahi nga “patyon” si Rep. France Castro, representante sa ACT Teachers Partylist ug deputy minority leader sa kamara, nga nanguna sa pagbutyag ug pagsukol sa CIF.

Gitukmod sa maong bangi ang dinaghang paghawa sa mga kapartido ni Duterte sa PDP-Laban—nga gikan 120 ka myembro, 15 na lamang nga myembro ang nabilin sa Kongreso. Lakip sa mga mihawa si Rep. Aurelio Gonzales Jr nga nagtudlo kang Duterte isip nagpaluyo sa mga atake ug pagpanghulga sa Kongreso.

Niadtong Nobyembre 7, walay kuskus-balungos nga gitangtang isip deputy speaker sa Kongreso si Gloria Macapagal-Arroyo, karibal ni Romualdez ug alyado sa mga Duterte. Kadungan niyang gitangtang ang pareho niya deputy speaker nga si Rep. Isidro Ungab, representante sa ikatulong distrito sa Davao City. Parehong wala mipirma si Arroyo ug Ungab sa usa ka resolusyon nga direktang nagmando nga “ipadayag” sa mga kongresista ang ilang “pag-ila, pakighiusa ug pagsuporta” kang Romualdez.

Maniobrahang militar

Niadtong Nobyembre 3, gibutyag ni Gen. Romeo Brawner, hepe sa AFP, ang matud niya “mga pakanang destabilisasyon,” pinaagi sa kudeta, batok kang Ferdinand Marcos Jr. Matud niya, ginaduso kini sa mga retiradong upisyal ug ginabaligya sa mga anaa sa aktibong serbisyo.

Gilimud sa kanhing kalihim sa Information and Communications Technology nga si Eliseo Rio, usa ka kanhing upisyal militar ug usa sa mga nagtukod sa grupong TNTrio, nga nagpakana sila og “destabilisasyon.” Matud niya, ang ilang kampanya, kauban ang September Twenty-One Reform Movement, mao ang pagrepaso sa milabayng eleksyong presidensyal aron pamatud-an ang malukpanong elektronikong pagpanglimbong nga nagpwesto kang Marcos Jr ug Sara Duterte sa gahum.

Gipanghimakak usab sa National Security Council (NSC) nga adunay nagatunhay nga pakanang destabilisasyon ug gisulting “nasayop” lamang ang mga repoter sa pagsabot. Nangulipas usab si Rodrigo Duterte nga aduna siyay kalambigitan sa “hungihong” human miangkon nga aduna siyay giistoryang mga retiradong heneral.

Hulga sa pag-aresto

Niadtong Nobyembre 14, nakagawas pinaagi sa pagpyansa si Sen. Leila de Lima gikan sa ikatulo ug ulahing kasong adunay kalambigitan sa “gyera kontra-droga” ni Duterte. Halos pito ka tuig nga gipriso ang kanhing senadora sa mga kasong nakabase sa mga testimonya sa mga nahukmang kriminal. Tinuyong gipig-ot si de Lima tungod sa pagpasiugda niya sa imbestigasyon sa paglambigit niya kang Duterte sa mga pagpatay sa “Davao Death Squad” ug sa isip numero unong kritiko sa “gyera kontra-droga” sa Senado.

Sa iyang temporaryong kagawasan, nagsaad si de Lima nga makigtinabangay sa International Criminal Court (ICC) kung asa gikasuhan si Duterte sa mga krimen batok sa katawhan. Magpadayon ang imbestigasyon kang Duterte taliwala sa mga pagsulay niining idiskaril kini. Ginadula usab sa pudok sa mga Marcos ang posibilidad nga hisgutan sa Kongreso ang mga basihan sa iyang kaso sa ICC.