3-ka-adlaw nga hunong-pasada. Gilunsad sa mga drayber ug opereytor sa dyip, sa pagpangulo sa Piston, ang tulo ka adlaw nga hunong-pasada gikan Nobyembre 20 hangtud 22. Tubag nila kini sa padayon nga pagpatuman sa jeepney phaseout sa rehimeng Marcos sa dagway sa pugos nga konsolidasyon sa ilang prangkisa. Sa unang adlaw sa welga, 85% ang paralisadong mga ruta sa Metro Manila. Nakalunsad og mga protesta sa 27 ka erya sa Maynila, sa mga syudad sa Baguio, Cebu, Iloilo, Bacolod ug Davao, ug sa Cavite, Laguna, Albay.

Panubagon ang US sa henosidyo sa Israel. Gipangulohan sa Bayan ang gatusan ka nagrali atubangan mismo sa US embassy sa Maynila niadtong Nobyembre 14 aron kundenahon ang papel sa US sa henosidyo batok sa katawhang Palestino ug pagpanulsol sa mga imperyalistang gyera. Unum ka raliyista ang nasamdan dihang giharang ug gisulayan sa pagbungkag sa mga pulis ang martsa ayha makaabot sa embahada.

Pilipinas, not for sale. Gisugat og protesta sa mga organisasyong Pilipino sa San Francisco, California ang pag-abot ni Ferdinand Marcos Jr ug sa iyang delegasyon sa US aron mosalmot sa Asia-Pacific Economic Cooperation Summit niadtong Nobyembre 14. Gimakmak nila ang pagbaligya ni Marcos sa natural nga bahandi ug kusog-pamuo sa Pilipinas sa langyawng mga kumpanya.

Hustisya para sa mga biktima sa Yolanda. Gipangunahan sa People’s Rising for Climate Justice Philippines ang protesta sa Mendiola niadtong Nobyembre 8 aron singlon ang estado sa “kriminal nga pagpasagad” niini sa mga biktima sa mga bagyo ug katalagman. Gipahigayon usab sa lain-laing grupong maki-kinaiyahan ang usa ka martsa sa San Juanico Bridge, Sta. Rita, Leyte padulong sa Tacloban City niadtong Nobyembre 7. Kini nga martsa kabahin saa 30-ka-adlaw nga alay-lakad aron dumdumon ang ika-10 nga anibersaryo sa Yolanda.

Walk-out sa mga kabatan-onan. Tulo ka gatus nga estudyante ug kabatan-onan gikan sa pribado ug pangpublikong unibersidad ang nag-walk-out sa klase niadtong Nobyembre 20 sa Cebu City aron iduso ang ilang katungod sa edukasyon ug batukan ang pagpanumpo sa estado. Niadtong Nobyembre 17, naglunsad usab og koordinadong protesta ang gatusan ka kabatan-onan sa 16 ka sentro sa protesta sa nasud aron dumdumon ang Pangkalibutang Adlaw sa mga Estudyante.

Wala pa gihapoy hustisya. Gipangunahan sa Alyansa ng Magbubukid sa Asyenda Luisita ang protesta sa Department of Agriculture sa Quezon City sa mga mag-uuma niadtong Nobyembre 16 aron dumdumon ang ika-19 nga anibersaryo sa masaker sa pito ka mamumuong-panguma sa usa ka kampuhan aron iduso ang ilang katungod sa yuta. Misalmot sa aktibidad ang mga mag-uuma gikan sa kasikbit nga Hacienda Tinang.

Welga sa Valle Verde. Gikasa sa Valle Verde Country Club Inc. Employees Union ang ilang welga niadtong Nobyembre 11 human madedlak ang negosasyon alang sa ilang CBA. Mibalibad ang maneydsment sa demanda sa mga mamumuo nga ₱38.50 dugang sa ilang inadlawan, bisan og 2019 pa ulahing nag-usbaw ang ilang suhulan.