Tulo ka Pulang manggugubat ang gipatay samtang anaa sa kustodiya sa militar niadtong milabayng duha ka semana. Sa Oriental Mindoro, nadakpan ug tinuyong gipatay sa 203rd IBde ang mga Pulang manggugubat sa Bagong Hukbong Bayan (BHB)-Mindoro nga silang Jethro Isaac Ferrer (Ka Pascual) ug Peter Rivera (Ka Rochie) sa Barangay Buong Lupa, Gloria niadtong Nobyembre 13. Gipagawas silang napatay sa usa ka hinimuhimong engkwentro niadtong adlawa. Gidakop usab dinhi si Ka Jasel ug wala pa gipakita hangtud karon.

Sa Sultan Kudarat, gidakop ug tinuyo usab nga gipatay sa 37th IB ang Pulang manggugubat nga si Rafael Zambrano (Ka Dodong/Tres) niadtong Oktubre sa Sityo Surong, Barangay Hinalaan, Kalamansig, Sultan Kudarat. Nadakpan si Zambrano sa usa ka balay sa Sityo Bugkog, Barangay Limulan niadtong Oktubre 8 ug gipailalum sa tortyur. Pagka Oktubre 11 sa buntag, nakaplagan ang iyang patayng lawas gikan sa gipagawas sa militar nga “engkwentro” niadtong Oktubre 10 sa gabii sa Sityo Kalamagan, Barangay Limulan.

Sa Negros Occidental, gipatay sa mga pwersa sa 15th IB ang mga mag-uumang silang Waren Cadarin ug Jovy Moreño ug gipagawas nga napatay sa usa ka binuhatbuhat nga engkwentro sa Barangay Yaoyao, Cauayan niadtong Nobyembre 7. Gidagit si Cadarin sa mga sundalo sa iyang umahan sa Sityo Indangawan, Barangay Manlucahoc, Sipalay niadtong Nobyembre 4. Nataho siyang nawala sa iyang pamilya sa pulisya ug lokal nga radyo niadtong tungura.

Pag-aresto. Gidakop ug gipriso sa mga sundalo sa 94th IB ug lokal nga pulis ang mga sibilya nga silang Joel Casusa ug Jenny Radles niadtong Nobyembre 8 sa Sityo Pisok, Barangay Buenavista, Himamaylan City, Negros Occidental. Si Casusa ang kanhing lider sa lokal nga asosasyon sa mga mag-uuma sa Barangay Buenavista, samtang si Radles aktibong myembro sa grupo. Kanhi nang biktima sa iligal nga pag-aresto si Casusa niadtong 2019. Ginapagawas sa militar nga mga myembro sila sa BHB nga nadakpan human ang usa ka engkwentro sa lugar.

Pagdagit. Sa Batangas, magkasunod nga gidagit sa mga pwersa sa estado ang organisador sa mangingisda nga si Mariano Jolongbayan niadtong Nobyembre 17 sa Lian ug si Karla Mae Monge, organisador sa kabatan-onan, niadtong Nobyembre 20 sa lungsod sa Tuy. Nanawagan ang ilang mga pamilya nga luwas nga ilutaw ug buhian ang duha.

Pagpamig-ot. Gipig-ot ug gihadlok sa mga pwersang militar ang pamilya sa aktibistang si Kristel Asilom, lider-kabatan-onan sa Anakbayan-Bulacan niadtong Nobyembre 11. Sa Davao City, gipig-ot usab sa mga elemento sa NTF-Elcac ang lider-mamumuo nga si Paul John Dizon niadtong Nobyembre 13. Parehong giadtuan sa mga sundalo ang balay sa ilang mga paryente. Sa kaso ni Dizon, gibaharan siyang pasakahan og mga kasong kriminal kung dili mokooperar.

Pangpangutingkay. Gisulod ug giutingkay sa mga sundalo sa 62nd IB ang balay sa mag-uumang si Maximo Cañete sa Barangay Amuntay ug Melvin Vilando sa Barangay Santol, pareho sa Binalbagan, Negros Occidental niadtong Nobyembre 13. Giakusahan silang mga tigsuporta sa hukbong bayan ug gihulgang patyon.