Giparalisa sa usa ka kolum sa Bagong Hukbong Bayan (BHB)-Bukidnon ang duha ka backhoe sa Ulticon Builders Incorporated (UBI) niadtong Oktubre 16 sa Sityo Mahagwa, Barangay Hagpa, Impasug-ong. Ang UBI usa ka kroning kumpanya sa konstruksyon sa mga Duterte nga naghakop sa dagkung pangpublikong kontrata nga nagkantidad og ₱1 bilyon hangtud ₱3 bilyon kada tuig.

Nalambigit ang UBI sa mga proyektong magun-ubon sa kinaiyahan ug mga umahan, ug nagpalayas sa mga mag-uuma sa ilang yuta. Notoryus ang kumpanya sa ubos kaayong suhulan, dili paghatag sa 13th month pay ug uban pang benepisyo. Wala usab kini naghatag og danyos sa mga nagubang balay, umahan ug gamit sa mga residente atol sa konstruksyon niini.

Niadtong 2018 ug 2021, gipahamtangan na og silot sa BHB ang UBI tungod sa pagguba niini sa kinaiyahan ug pag-abuso sa mga mamumuo.

Lakip sa mga kontrata sa UBI ang konstruksyon sa “farm-to-market-roads” (FMR) sa amihanan ug habagatang Mindanao nga ginagamit karon sa dagkung burgesya-kumprador aron papaspason ang pagsulod ug operasyon sa mga langyawng mina, ekspansyon sa komersyal nga plantasyon ug mga planta sa enerhiya sa mga yutang pang-agrikultura ug yutang kabilin.

Kaabag ang UBI sa anti-katawhang kampanyang kontra-insurhensiya sa AFP sa pagtukod sa maong mga FMR. Dayag ang pagsuporta sa kumpanya sa mga “programang pangkalinaw” sa bergudong 403rd Brigade ug NTF-Elcac nga nagsabwag og kalisang sa katawhan sa Bukidnon. Gawas sa konstuksyon sa mga FMR sa prubinsya, nalambigit usab kini sa konstruksyon sa pasilidad sulod kampo militar sa 8th IB.

Gitukod sa Davao ang UBI niadtong 1993 sa pamilyang Gonzalez ug gipangulohan karon ni Carlos Gonzalez. Anak niya ang kasamtangang representante sa MARINO partylist ug deputy majority leader sa kamara nga si Lisandro Gonzalez. Lakip usab siya sa mga nagpadagan sa UBI. Usa si Lisandro sa lunod-patay nga tigsuporta sa mga balaodnon sa rehimeng Marcos, lakip na ang Maharlika Investment Fund.