Gidis-armahan sa mga Pulang manggugubat sa Bagong Hukbong Bayan (BHB)-Sultan Kudarat ang despotiko ug ahente sa 57th IB nga si Junior Martinez sa Sityo Badiangan, Barangay Salangsang sa Lebak, Sultan Kudarat niadtong Nobyembre 13, alas-5 sa buntag. Nakumpiska kaniya ang usa ka M16, usa ka shotgun, duha ka pistola, usa ka hand grenade, ug radyong VHF.

Gigamit ni Martinez ang maong mga armas sa pagpanghadlok aron mangilog og yuta sa masang mag-uuma sa lugar. Suportado si Martinez sa 57th IB ug aktibong nakigtinabangay sa mga sundalo.

Niadtong Nobyembre 10, naglunsad og operasyong haras ang BHB-Sultan Kudarat batok sa detatsment sa 37th IB sa Sityo Pangyen, Barangay Hinalaan, Kalamansig. Tigpasiugda ang mga sundalo sa 37th IB sa pagsugalsugal, paghuboghubog ug uban pang pagsamoksamok sa baryo. Balik-balik usab kining namig-ot ug namugos sa mga residente nga “mosurender.” Gikalipay sa mga residente ang opensiba tungod sa perwisyong dala sa militar sa lugar.

Sa Quezon, giguba ug gisunog sa BHB-Quezon ang duha ka dump truck nga gamit sa kumpanyang kwari sa lungsod sa Unisan niadtong Nobyembre 8. Gilunsad kini isip pahimangno sa mga kumpanyang lambigit sa proyektong magun-ubon sa kinaiyahan.