Duha ka sibilyan ang ginpatay sang mga suldado sang Armed Forces of the Philippines (AFP) sadtong Disyembre 10 sa Iloilo kag Disyembre 17 sa Sorsogon sadtong nagligad nga tuig. Samtang, ginpatay man sang militar ang duha ka sibilyan nga nagbisita sa ila nga himata nga Pulang hangaway sa Batangas sadtong Disyembre 17, 2023.

Ginpatay sang uhaw sa dugo nga mga pasista sang 31st Division Reconnaissance Company (DRC) ang may kulang sa paminsaron nga sibilyan nga si Bombik Bajoyo sadtong Disyembre 10, 2023 sa Sitio Tagbakan 1, Barangay Jayubo, Lambunao, Iloilo. Ginapagwa sang mga pasista nga myembro sang Bagong Hukbong Bayan (BHB)-Central Panay si Bajoyo kag nga napatay siya sa isa ka engkwentro.

Ginpamatud-an sang mga residente sa Sityo Jagnaya nga sibilyan si Bajoyo kag may kulang sa paminsaron. Posible nga ginpatay siya sang mga suldado sang nasal-an nga Pulang hangaway. Anom na ka tuig nga nagapuyo sa Sityo Tagbakan ang biktima, sandig sa mga residente.

Sa Sorsogon, ginpatay sang 31st IB si Joseph Esperanzate sa iya nga balay sa Purok Iraya, Barangay Union sa banwa sang Gubat, sadtong Disyembre 17, 2023 mga alas 4 sang aga. Anay katapo sang BHB si Esperanzate apang madugay na nga naghalin sa hukbo kag nangabuhi bilang sibilyan. Sugod 2019, pasulit-sulit siya nga ginapilit sang militar nga magpaidalom sa E-CLIP apang namalibad siya kag ginhambal nga gusto niya nga mangabuhi sang linong.

Sa Batangas, napatay sang 59th IB ang mga sibilyan nga sila ni Pretty Sheine Anacta, 19, kag si Rose Jane Agda, 30, sa patarasak nga pagpaniro sini sa Barangay Malalay, Balayan, Batangas sadtong Disyembre 17, 2023 sang kaagahon. Nagbisita ang duha sa ila himata nga Pulang hangaway sang BHB sang sila ang ginpatay.

Base sa natipon nga report sang BHB, nalipungan si Pretty Sheine sa una nga hugna sang pagpaniro sang mga pasista nga tropa, bag-o siya lubos nga ginpatay sang militar. Maka-alakig naman ang sitwasyon ni Rose jane sang makita ang bangkay niya sa punerarya kung sa diin naka-us-os ang pang-idalom nga panapton sini, palatandaan nga ginhimuslan siya.

Samtang, gindakop kag tubtob subong wala pa napakita sang militar ang napilasan nga hangaway nga si Baby Jane Orbe (Ka Binhi). Wala siya sang ikasarang nga magbato. Sandig sa pagsulundan sang internasyunal nga makitawhanon nga laye, dapat nga kilalahon ang iya mga kinamatarung sang kabanggi nga armadong pwersa. Namartir man ang lima ka Pulang hangaway sa nasambit nga pag-atake.

Pag-abdak. Gin-abdak sang tropa sang 62nd IB ang pamatan-on nga mangunguma nga si Allan Paul Rayna halin sa balay sang iya pamilya sadtong Disyembre 23, 2023 sa Sityo Tayubong, Barangay Puso, La Castellana, Negros Occidental. Wala pa siya nakit-an tubtob subong. Tuman ang pagkabalaka sang pamilya Rayna sa kahimtangan sang ila himata.

Pagpalayas. Tubtob Enero 6 na lang ang ginhatag sang Authority of the Freeport Area of Bataan (AFAB) sa may 200 ka pamilya nga residente sang Narra Dormitory sa Barangay Maligaya, Mariveles, Bataan para maghalin. Ginapalayas ang mga residente tungod nga pagasakupon sang pagpasangkad sang FAB ang nasambit nga lugar.