Magapadayon ang protesta kag ululupod nga hublag sang mga tsuper kag opereytor sang dyip kontra sa sapilitan nga konsolidasyon sang prangkisa kag pagpatuman sang peke nga Public Utility Vehicle Modernization Program (PUVMP) sa pagbukas sang tuig 2024. Ini ang ila sabat sa pagbalewala ni Ferdinand Marcos Jr sa hibubun-ot sang mga drayber kag opereytor. Suno sa Pagkakaisa ng mga Samahan ng Tsuper at Operator Nationwide (Piston), pamatuod ang kawala-aksyon ni Marcos nga “palpak, paantus, kag tuta” ang iya nga rehimen.

Sadtong Disyembre 2023, ginpakita sang Piston kag Samahang Manibela mananakay at Nagka-Isang Terminal ng Transportasyon (Manibela) ang ila nga pagpamatuk sa PUVMP sa asud-asod nga untat-byahe kag malaparan nga protesta sa pungsod, nagapanguna sa Metro Manila. Ginatantya nga sobra ukon kulang sa 4,000 ang nakigbahin sa protesta sang duha ka grupo sa Mendiola sa Manila sadtong Disyembre 29, 2023. masobraa 330 ka dyip ang gindala sang mga tsuper sa protesta. Nagtambong sa protesta sa Manila ang mga drayber kag opereytor sang Starter-Piston kag Manibela halin sa Southern Tagalog.

Sa iban nga bahin sang pungsod, nag-ugyon man sa protesta kag kampuhan ang mga drayber kag opereytor kontra sa pagmasaker sa ila nga palangabuhian. Sa Bacolod City, naglab-ot sa 2,000 ang nakigbahin sa martsa-protesta kag untat-byahe sa syudad sadtong Disyembre 29, 2023. Nagmartsa sila padulong sa munisipyo para sukton ang lokal nga gubyerno sa salabton sini sa pagpatuman sang PUV phaseout.

Sa Davao City, nag-untat-byahe ang Transmision-Piston sadtong Disyembre 27, 2023. ginatantya nga naparalisa sang grupo ang 70% sang tanan nga ruta sang dyip sa syudad. Sa Cebu City, nagkampuhan ang mga katapo sang Piston-Cebu sa upisina sang Land Transportation Franchising and Regulatory board (LTFRB) Region 7 sadtong Disyembre 28, 2023 tubtob Disyembre 29, 2023. Sa Iloilo City, nag-untat-byahe kag nagkampuhan ang mga drayber kag opereytor sa upisina sang LTFRB Region 6 sadtong Disyembre 27, 2023 tubtob Disyembre 28, 2023.

Nagapati ang Piston nga bugtong nga paagi sa ila nagabaskog nga pwersa kag padayon nga ululupod nga paghulag subong nga 2024 mabatuan ang plano nga PUVMP sang rehimen nga magamasaker sa ila nga palangabuhian.

Samtang, ginmandu-an sadtong Disyembre 28, 2023 sang Korte Suprema ang Department of Transportation (DOTr) kag ang LTFRB nga magkomento sa petisyon nga ginpasaka sang Piston kontra sa pagpatuman sang pilit nga konsolidasyon sang prangkisa kag PUVMP. Ginhatagan ang duha ka ahensya sang tubtob 10 ka adlaw para magkomento.