Duha ka sibilyan ang gipatay sa mga sundalo sa Armed Forces of the Philippines (AFP) niadtong Disyembre 10 sa Iloilo ug Disyembre 17 sa Sorsogon niadtong milabayng tuig. Samtang, napatay usab sa militar ang duha ka sibilyan nga mibisita sa ilang paryente nga Pulang manggugubat sa Batangas niadtong Disyembre 17, 2023.

Gipatay sa uhaw-sa-dugo nga mga pasista sa 31st Division Reconnaissance Company (DRC) ang sibilyang adunay kabilinggan sa pangutok nga si Bombik Bajoyo niadtong Disyembre 10, 2023 sa Sitio Tagbakan 1, Barangay Jayubo, Lambunao, Iloilo. Gipagawas sa mga pasista nga myembro sa Bagong Hukbong Bayan (BHB)-Central Panay si Bajoyo ug nga napatay siya sa usa ka engkwentro.

Gipamatud-an sa mga residente sa Sityo Jagnaya nga sibilyan si Bajoyo ug adunay kabilinggan sa pangutok. Posible kunong gipatay siya sa mga sundalo dihang naalaan siyang Pulang manggugubat. Unum ka tuig nang nanimuyo sa Sityo Tagbakan ang biktima, matud sa mga residente.

Sa Sorsogon, gipatay sa 31st IB si Joseph Esperanzate sa iyang balay sa Purok Iraya, Barangay Union sa lungsod sa Gubat niadtong Disyembre 17, 2023 sa alas-4 sa buntag. Kanhing myembro sa BHB si Esperanzate apan dugay nang mihawa sa hukbo ug nanimuyo isip sibilyan. Gikan 2019, subli-subli siyang ginapugos sa militar nga magpailalum sa E-CLIP apan mibalibad siya ug gisulting gusto niyang manimuyong malinawon.

Sa Batangas, napatay sa 59th IB ang mga sibilyan nga silang Pretty Sheine Anacta, 19, ug si Rose Jane Agda, 30, sa paturagas nga pagpamusil niini sa Barangay Malalay, Balayan, Batangas niadtong Disyembre 17, 2023 sa kaadlawon. Miduaw ang duha sa ilang paryente nga Pulang manggugubat sa BHB dihang gipatay.

Matud sa nakalap nga taho sa BHB, nakuyapan si Pretty Sheine sa unang bwelo sa pagpamusil sa mga pasistang tropa, ayha siya gidayunan sa pagpatay sa militar. Linuog usab ang sitwasyon ni Rose Jane dihang makita ang iyang patayng lawas sa punerarya kung asa nakaubos ang pantalon niini, timaan nga gilugos siya.

Samtang, gidakop ug hangtud karon wala pa gipakita sa militar ang samarong manggugubat nga si Baby Jane Orbe (Ka Binhi). Wala siya sa kapasidad nga makasukol. Subay sa mga lagda sa internasyunal na makitawhanong balaod, angayang ilhon ang iyang mga katungod sa kaaway nga armadong pwersa. Namartir usab ang lima ka Pulang manggugubat sa maong pag-atake.

Pagdagit. Gidagit sa tropa sa 62nd IB ang batan-ong mag-uuma nga si Allan Paul Rayna gikan sa balay sa iyang pamilya niadtong Disyembre 23, 2023 sa Sityo Tayubong, Barangay Puso, La Castellana, Negros Occidental. Wala pa siya nakita hangtud sa kasamtangan. Grabe ang kabalaka sa pamilyang Rayna sa kahimtang sa ilang paryente.

Pagpalayas. Gipapahawa na sa Authority of the Freeport Area of Bataan (AFAB) hangtud Enero 6 ang 200 ka pamilyang residente sa Narra Dormitory sa Barangay Maligaya, Mariveles, Bataan. Gipalayas ang mga residente tungod kay langkub sa pagpalapad sa FAB ang maong lugar.