Dungan-dungan nga armadong aksyon ang gilunsad sa Bagong Hukbong Bayan (BHB)-Northern Negros batok sa mersenaryong Sarona Group niadtong Enero 2 sa Purok Kawayan, Barangay Bug-ang, Toboso, Negros Occidental.

Giambus ug napatay sa BHB ang lider sa grupo nga si Juvie Sarona. Giparalisa ug gisunog usab ang traktora nga gipanag-iyahan sa iyang amahan. Nakumpiska usab sa balay sa mga Sarona ang usa ka M2 Carbine, usa ka .45 Colt, usa ka .357 revolver, usa ka shotgun, nagkadaiyang mga magasin ug mga bala. Gikumpiska usab ang ilang mga gadyet nga adunay mga sulod nga mahinungdanong impormasyon.

Nalambigit ang maong grupo sa pagmasaker sa siyam ka mamumuo sa tubuhan niadtong Oktubre 20, 2018. Nahitabo ang gitawag nga “Sagay masaker” sa Barangay Bulanon, Sagay City. Binayran usab kini ug gisuportahan sa militar ug dagkung kumprador-agalong yutaan ug asendero sa isla.

Gikalipay sa katawhan sa Northern Negros ang pagsilot sa mga Sarona tungod kay nahatagan og hustisya ang pagpanglupig ug pagpahimulos nga ilang giantus gikan sa ilang mga kamot.

Samtang, giambus sa BHB-Central Negros ang elemento sa CAFGU nga si Sunnyboy Teves sa Sityo Tulingon, Barangay Binubohan, Guihulngan City, Negros Oriental niadtong Disyembre 27, 2023. Si Teves nalambigit sa daghang krimen batok sa katawhan sa Central Negros.

Gipasalamatan sa BHB ang masa nga mitabang sa armadong aksyon ug ang padayon nga pagsuporta niini sa hukbong bayan.