Magpadayon ang protesta ug hiniusang aksyon sa mga drayber ug opereytor sa dyip kontra sa pugos nga konsolidasyon sa prangkisa ug pagpatuman sa mini nga Public Utility Vehicle Modernization Program (PUVMP) sa pag-abli sa tuig 2024. Kini ang ilang tubag sa pagmagahi ni Ferdinand Marcos Jr sa reklamo sa mga drayber ug opereytor. Matud sa Pagkakaisa ng mga Samahan ng Tsuper ug Operator Nationwide (Piston), timaan ang kawalay-aksyon ni Marcos nga “palpak, paantus, ug itoy” ang iyang rehimen.

Niadtong Disyembre 2023, gipakita sa Piston ug Samahang Manibela Mananakay ug Nagka-Isang Terminal ng Transportasyon (Manibela) ang ilang pagsupak sa PUVMP sa sunud-sunod nga hunong-pasada ug malukpanong protesta sa nasud, nag-una sa Metro Manila. Gibanabanang kapinkun-kulang 4,000 ang misalmot sa protesta sa duha ka grupo sa Mendiola sa Maynila niadtong Disyembre 29, 2023. Kapin 330 ka dyip ang dala sa mga drayber sa protesta. Misalmot sa protesta sa Maynila ang mga drayber ug opereytor sa Starter-Piston ug Manibela gikan sa Southern Tagalog.

Sa laing bahin sa nasud, naghiusa usab sa mga protesta ug kampuhan ang mga drayber ug opereytor kontra sa pagmasaker sa ilang kabuhayan. Sa Bacolod City, mikabat sa 2,000 ang misalmot sa martsa-protesta ug hunong-pasada sa syudad niadtong Disyembre 29, 2023. Nagmartsa sila padulong sa munisipyo aron singlon ang lokal nga gubyerno sa tulubagon niini sa pagpatuman sa PUV phaseout.

Sa Davao City, naghunong-pasada ang Transmision-Piston niadtong Disyembre 27, 2023. Gibanabanang naparalisa sa grupo ang 70% sa tanang ruta sa dyip sa syudad. Sa Cebu City, nagkampuhan ang mga myembro sa Piston-Cebu sa upisina sa Land Transportation Franchising and Regulatory Board (LTFRB) Region 7 niadtong Disyembre 28, 2023 hangtud Disyembre 29, 2023. Sa Iloilo City, naghunong-pasada ug nagkampuhan ang mga drayber ug opereytor sa upisina sa LTFRB Region 6 niadtong Disyembre 27, 2023 hangtud Disyembre 28, 2023.

Nagtoo ang Piston nga bugtong sa ilang nagkakusog nga pwersa ug sa makanunayong hiniusang protesta karong 2024 mabatukan ang pakanang PUVMP sa rehimen nga magmasaker sa ilang panginabuhian.

Samtang, gimandoan niadtong Disyembre 28, 2023 sa Korte Suprema ang Department of Transportation (DOTr) ug ang LTFRB nga magkomento sa petisyong gihaon sa Piston kontra sa pagpatuman sa pugos nga konsolidasyon sa prangkisa ug PUVMP. Gihatagan ang duha ka ahensya og 10 ka adlaw aron magkomento.