Nailista kadagiti naglabas a lawas ti nagsasaruno a kaso ti panagarestar, panagtiktik ken pananglipit dagiti elemento ti militar laban kadagiti progresibo ken aktibista idiay rehiyon ti Negros, Bicol ken Southern Tagalog.

Idiay Negros Occidental, inarestar dagiti pulis ni Pertinisa Jereula Charita, 55, bayat a bimmisita iti asawa na iti pagbaludan idiay San Carlos City idi Pebrero 13. Kuna iti Human Rights Advocates Negros (HRAN), parparuaren dagiti pulis a nakumpiskar kenni Charita ti maysa a kalibre .22 pistola idi makapkapan.

Ni Charita, kameng ti Kapatid-Negros ken National Federation of Sugar Workers (NFSW), ket asawa ni Leon Charita nga inarestar idi Setyembre 2019 iti kaso nga illegal possession of firearms and explosives. Kakuyog ni Pertinisa dagiti annak ken appoko na idi bimmisita kenni Leon tapno lagipen ti kasangay na iti uneg ti pagbaludan.

Idiay Albay, tiniktikan ken linipit dagiti soldado ti 9th ID dagiti kabagian dagiti miembro ti Farmer’s Assistance for Resource Management, Education and Rehabilitation Incorporated (FARMER Inc) a da Maggie Seva, opisyal administratibo na, ken istap a ni Fidel Mirando idi umuna a kagudua ti Pebrero. Impauneg iti iligal nga interogasyon dagiti kabagian ti dua.

Idiay Rizal, nagbalay-balay ti maysa nga elemento ti 2nd ID idiay Barangay San Isidro, Antipolo City, Rizal idi maikadua a lawas ti Pebrero ken nagdamdamag kasilpo dagiti lider-masa ti progresibo a tignayan idiay Rizal. Nakasibilyan ti soldado ken nagpammarang nga empleyado ti Antipolo City Hall tapno iyaramid ti panagtiktik. Kuna dagiti kaarruba, al-alaen kadakuada dagiti soldado dagiti personal nga impormasyon ken numero iti selpon dagiti lider-masa.

Idiay Oriental Mindoro, nangburibor ken namutbuteng dagiti ahente militar ken pulis kadagiti mangngalap ken makatao a grupo nga agiyar-aramid ti Boat Construction Project idiay Naujan idi Pebrero 7. Panggep ti proyekto nga agibunong kadagiti barangay ti ramramit iti panagkalap kadagiti naapektaran ti oil spill idi napalabas a tawen. Kalpasan a buriburen ti programa, awanan panagbain met nga inaklon ti militar a ti programa ket paset ti kampanya ti National Task Force-Elcac.