Nalista sa nagligad nga mga semana ang asud-asod nga mga kaso sang pag-aresto, pagpanilag kag pagpang-ipit sang mga elemento sang militar batuk sa mga progresibo kag aktibista sa rehiyon sang Negros, Bicol kag Southern Tagalog.

Sa Negros Occidental, gin-aresto sang mga pulis si Pertinisa Jereula Charita, 55, samtang nagabisita sa iya nga asawa sa bilangguan sa San Carlos City sadtong Pebrero 13. Sandig sa Human Rights Advoctes Negros (HRAN), ginapagwa sang mga pulis nga nakumpiskar kay Charita ang isa ka kalibre .22 pistola sang ginkapkapan.

Si Charita, katapo sang Kapatid-Negros kag National Federation of Sugar Workers (NFSW), ang asawa ni Leon Charita nga gin-aresto sadtong Setyembre 2019 sa kaso nga illegal possession of firearms and explosives. Upod ni Pertinisa ang iya nga mga kabataan kag apo sang nagbisita kay Leon paraa dumdumon ang iya kaadlawan sa sulod sang prisohan.

Sa Albay, ginpanilagan kag gin-ipit sang mga suldado sang 9th ID ang mga himata sang mga miyembro sang Farmer’s Assistance for Resource Management, Education and Rehabilitation Incorporated (FARMER Inc) nga sila ni Maggie Seva, upisyal administratibo sini, kag istap nga si Fidel Mirando sadtong una nga bahin sang Pebrero. Ginpaidalom sa iligal nga interogasyon ang mga himata sang duha.

Sa Rizal, nagbalay-balay ang isa ka elemento sang 2nd ID sa Barangay San Isidro, Antipolo City, Rizal sadtong ikaduha nga semana sang Pebrero kag nangusisa kaangot sa mga lider-masa sang progresibo nga kahublagan sa Rizal. Nakasibilyan ang suldado kag nagpakuno-kuno nga empleyado sang Antipolo City Hall para tigayunon ang panilag. Sandig sa mga tupad balay, ginakuha sa ila sang mga suldado ang mga personal nga impormasyon kag numero sa selpon sang mga lider-masa.

Sa Oriental Mindoro, nanggamo kag namahog ang mga tinawo sang militar kag pulis sa mga mangingisda kag makitawhanon nga grupo nga nagpatigayon sang Boat Construction Project sa Naujan sadtong Pebrero 7. Katuyuan sang proyekto nga managtag sang mga Bangka kag kagamitan sa pangisda sa mga naapektuhan sang oil spill sadtong nagligad nga tuig. Pagkatapos gamuhon ang programa, wala huya naman nga gin-angkon sang militar nga ang programa ang kabahin sang kampanya sang National Task Force-Elcac.