Sumagmamano a lawas sakbay ti maika-7 tawen nga anibersaryo ti panagbomba ti Armed Forces of the Philippines (AFP) idiay Marawi City, nagprotesta dagiti umili tapno agkiddaw da iti hustisya a nabayagen a naitantan. Idi Mayo 13, naggu-ummong idiay Rizal Park ti syudad dagiti residente a saan pay nakaawid kadagiti komunidad da.

Sinalungasing da ti panagkirmet ti Marawi Compensation Board (MCB) iti maiparbeng a maawat da a kompensasyon wenno danyos tapno mabalin da a bangonen manen dagiti nadadael a balay ken sanikua da. Imbes a mangted kadakuada iti umdas a pondo, nangipaay ti MCB iti baro a “pamuspusan” ti panangkwenta iti pannakadadael a nangikkat iti “depreciation cost” ( imbabada a gatad ti sanikua gapo iti panaglabas ti tiempo wenno pannakadadael) dagiti sanikua. No nadadaan ti istruktura, dakdakkel ti maikissay ket ngarod basbassit ti magunggona. Iti sidong dayta, otomatik a makissayan ti naikeddeng a kompensasyon ti maysa a claimant iti 60% agingga 85% no minimum a 10 tawenen daytoy a nakatakder sakbay a bombaen ti AFP.

Daytoy ket maikontra iti immuna a naituding a proseso ti Implementing Rules and Regulations (IRR) ti Marawi Siege Compensation Act. Naibasar daytoy a linteg iti “fair market value” (wenno presyo iti pagtagilakuan) a resulta ti pannakiyuman kadagiti nagkiddaw, wenno iti “replacement cost” wenno “repair cost” dagiti naan-anay a nadadael wenno saan unay a nadadael a pagtaengan wenno pasdek ti kultura ken komersyo. Awan ti otoridad ti MCB a mangbalbaliw kadagiti pagalagadan iti panagkwenta a nailanad iti linteg, sigun kadagiti nagprotesta.

Mapattapatta a masapol a mangilatang ti nasyonal a gobyerno iti di kumurang a ₱5 bilyon kada tawen tapno mabayadan amin a dinadael ti AFP. Lima tawen laeng ti panagpaot ti MCB, ket kalpasan dayta awanen ti maawat dagiti biktima.