Ti Balikatan 39-24 ket opisyal a nalpas idi Mayo 10, ngem rinibo a soldado ti US ti adda pay laeng iti Pilipinas para iti maikadua a serye ti Salaknib-24 a damo a nairussuat idi Abril. Ado pay ti sumaruno a war games ti “nalimed” nga irussuat ti US iti pagilian. Adda pay laeng dagiti soldado ti Australia iti pagilian para iti panagsanay a Kasangga.

Idi Mayo 11, naangay ti Salaknib iti ili ti Basco, Batanes. Iti linged ti “port improvement project” inrugi ti US Army ken Philippine Army ti panagbunag ti bato manipod iti Basco Port. Ti nasao a puerto ket maibilang a “sibilyan a puerto” ngem agserbinto a puerto dagiti bapor a pakigubat ti US. Mainayon ti sangladan kadagiti dadduma pay a pasilidad a binangon ti US idiay Chadpidan, Basco ken idiay San Rafael, Itbayat ken Mavulis Island.

Kabayatanna, nangrugi ti Kasangga war games iti nagbaetan ti Philippine Army ken Australian Defense Force (ADF) a nakipasetan ti 100 tropa a Pilipino ken 50 a tropa ti Australia idi Mayo 13 iti hedkwarters ti 5th ID idiay Gamu, Isabela, nga agbayag agingga Hunyo 21.

Karaman iti daytoy a war games ti panagipabanto kadagiti mortar ken operasyon ti drone a mangriribok kadagiti komunidad, ken ti “kontra-terorismo” a nangnangruna a nakasentro iti panagranggas kadagiti mannalon ken aktibista.

Kabayatanna, mangirussuat ti US ti RimPac war games iti nadumaduma a paset ti Asia ken US manipod Hunyo 29 agingga Agosto 4. Ti RimPac (Rim of the Pacific) ket naikuna a “kadakkelan a naval war games” iti intero a lubong. Ti Pilipinas ket lumaok kadaytoy.

Kontra-Balikatan 39-24

Iti panaglippas ti Balikatan idi Mayo 10, pinuoran dagiti nadumaduma a grupo ti bandera ti imperyalista nga US iti sango ti hedkwarters ti AFP idiay Camp Aguinaldo, Quezon City. Tinubngar da ti panangtulaw ti US iti soberanya ti Pilipinas, dagiti panaglabsing iti karbengan-tao daytoy, ken panangisungsong iti Pilipinas iti durdurugan a gerra iti kalaban nga imperyalista a China. Nagisab-it met kadagiti balatengga idi Mayo 6 dagiti grupo idiay Ilocos Norte.

Kabayatanna, idiay pagilian ti Australia ket inrussuat ti Kabataang Makabayan (KM) ken Katipunan ng mga Gurong Makabayan (Kaguma) dagiti bukod da nga aktibidad tapno tubngaren ti Balikatan. Ti konsulado ti US idiay Melbourne ket pininturaan ti KM idi umuna a lawas ti Mayo.

Kabayatanna, nangibitin dagiti miyembro ti Kaguma iti dakkel a balatengga iti maysa a rangtay idiay Malibay, Pasay idi Mayo 10. Nakasurat ditoy ti “Sarangeten ti imperyalista a gubat! Idur-as ti demokratiko a rebolusyon ti umili!”