Kadagiti kallabes a lawas, ti terorismo ti estado iti sidong ti turay ni Marcos ket awan-anawa. Nairekord dagiti kaso ti panagbomba, iligal a panangaresto ken pananglipit babaen iti panagikaso ti “terrorism financing” maibusor kadagiti demokratiko nga organisasyon ken sektor.

Panagbomba. Nangitinnag dagiti jet fighter ti Philippine Air Force iti 10 bomba kadagiti barangay ti Peñablanca, Cagayan idi Mayo 10 iti alas-2 ti parbangon. Natinnag dagitoy idiay Sityo Ebi, Lapi ken kadagiti kabangibang a barangay. Nangngeg dagiti nakaam-amak a panagbittak, istraping ken panagtayab ti jet fighter agingga kadagiti ili ti Baggao, Enrile, Amulung ken iti Tuguegarao City. Di kumurang a 690 pamilya ti napilitan a naglibas gapo iti terorista a panangraut ti militar kadagiti komunidad.

Pannaka-aresto. Idi Abril 21, inaresto dagiti soldado ti 4-bulan a masikog a Dumagat-Remontado a ni Manilyn dela Cruz. Napabasol kas miyembro ti New People’s Army (NPA), ken naidarom kadagiti agtutuun a kriminal a kaso. Sakbay a natiliw, napuntaan iti bala manipod iti awan aniaman a panagpaltog dagiti soldado iti kalapaw a pagnanaedan da a sangapamilyaan idiay Sityo Pinamaypayan, Barangay Umiray, Dingalan, Aurora.

Idiay Taguig City, nasentensyaan ken naibalod idi Mayo 16 ti NGO worker a ni Salome Crisostomo-Ujano, agtawen iti 67, gapo iti kaso a panagrebelde. Nairaman ni Ujano iti maysa nga engkwentro ti NPA ken dagiti soldado idiay Quezon a napasamak idi Nobyembre 2005.

Idiay Cebu City, inaresto idi Mayo 13 ti 26 nga agdama ken sigud nga staff ti Community Empowerment Resource Network (Cernet) Inc (mairaman dagiti tallo a natay) ken ti maysa a lider-mangmangged iti kaso a “terrorism financing”. Pinabasol ti organisasyon a mangmangted ti pondo iti NPA-South East Negros. Nagpyansa dagiti biktima tapno temporaryo a mawayawayaan.

Panagpatudo ti bala. Ti 94th IB ket nagpatudo ti bala idiay Barangay Carol-an, Kabankalan City, Negros Occidental idi Mayo 6 a pinaruar na nga engkwentro. Gapo iti pammaltog, nasurok 480 nga umili ti Sityo Tagoc, Bobon, ken Matampa ti Barangay Carol-an ti nagbakwit. Karaman kadagiti napilitan a nagbakwit ti 146 ubbing ken 14 nataengan.

Kinaranggas kadagiti babbai. Dagiti assawa a babbai dagiti balud a politikal a bimmisita iti National Bilibid Prison idi Abril 21 ket pinaglabus. Ti maysa kadakuada ket 10 a daras a pinagturirit ti maysa nga opisyal ti pagbaludan. Impambar da nga agbirbirok da ti iligal a droga, kadawyan a mapatpaturirit ken sirsiripan ti pribado a paset dagiti babbai a bumisbisita iti pagbaludan.

Pananglipit. Binutbuteng ken linipit dagiti ahente ti 10th ID idi Mayo 9 ni Ricardo Baron, 71, organisador ti Transmision-Piston idiay Agdao, Davao City. Dua oras isuna a “kinasarita” ken “paspasukuen” dagitoy.

Idiay Ilocos Norte, arbitraryo a kinumpiskar ti lokal a pulis dagiti questionnaire ti Alyansa ng mga Magsasaka sa Ilocos Norte (AMIN) a mangam-ammo ti kasasaad ti komunidad iti daytoy a panawen ti El Niño idiay Barangay Puzol, Pinili idi Mayo 10. Sigun iti AMIN, nagturong dagiti opisyal ti pulis iti balay ti maysa a residente ti barangay no sadino a nakumpiskar dagiti dokumento.