Dagiti minero ti Dontog-Manganese Pocket Miners Association (DOMAPMA) nagbarikada maibusor iti dakkel a kumpanya ti pagminasan a Benguet Corporation, Inc. (BCI) idiay Sityo Dalicno, Barangay Ampucao, Itogon, Benguet idi Mayo 13. Ti barikada ket paset ti pannakidangadang da tapno masalakniban ti karbengan da iti daga ken pagbiagan da maibusor iti inkapilitan a panangsamsam ti BCI kadagiti pocket mine ti DOMAPMA ken ti di nainkalintegan a panagpangato ti abang kadagiti alikamen a pangminas.

Babaen ti mandar ti BCI, pinagbalin dagiti lokal nga ahensya ti gobyerno a maiparit ti bassit nga operasyon ti panagminas ti DOMAPMA gapo iti isyu ti “regulasyon” ken “isyu a pang-aglawlaw” a pinataod kano ti operasyon. Patien dagiti minero a pambar laeng daytoy tapno makastrek ti BCI iti lugar.

Agdagop iti 500 agingga 1,000 a trabahador ti mapukaw ti pagbiagan da gapo iti ilegal a pannakaserra ti pagbiagan da. Naapektaran met ti panagbiag dagiti katutubo iti komunidad ken kadagiti kabangibang a barangay, ken uray pay kadagiti dadduma a probinsya iti Cordillera ken Cagayan Valley nga agub-ubra ditoy.

Sakbay pay a pinasardeng ti BCI ti panagminas, pinadas dan ti agminas iti DOMAPMA agraman ti dadduma a paset ti barangay ti Ampucao ken Virac. Kakumplot ti kumpanya ti National Commission on Indigenous Peoples tapno mapapartak ken agkusit kadagiti dokumento para iti espesyal a pammalubos. Pinanggep da a likawan ti proseso ti panangala ti Free, Prior, and Informed Consent manipod kadagiti katutubo iti lugar.

Sakbay dayta, nagisayangkaten ti barikada maibusor iti manangabuso ken mananggamgam a BCI dagiti dadduma a residente idi Abril. Inrupir da nga aramiden a nalaklaka ti gatad dagiti alikamen a pangminas nga ipapaabang kadakuada.