Kagiddan ti milyun-milyon nga umili iti lubong a nagisayangkat kadagiti panagtignay kas pannakikaykaysa kadagiti Palestino, nagmartsa agturong iti embahada ti Israel idiay Bonifacio Global City (BGC) idiay Taguig City dagiti agtutubo ken dadduma pay a sektor idi Mayo 15. Kinondenar da manen ti henosidyo ti US ken Israel idiay Gaza, nangruna ti panangraot da idiay Rafah, ti makunkuna a “maudi a sangtwaryo” ti ginasot a ribo a Palestino.

Pinadas dagiti pulis ken gwardya ti BGC a pasardengen ti protesta, a nakaigapuanan ti pannakasugat ti 15 a raliyista.

Adda nakasina a protesta idiay Quezon City kinamalman na dagiti dadduma a progresibo ken nailian-demokratiko a grupo.

Kamaymaysa dagiti panagtignay iti internasyunal a kiddaw tapno lagipen ti maika-76 nga anibersaryo ti Al Nakba (Ti Didigra) no sadino nga immuna a naranggas a pinatakyas ti tignay a Zionista dagiti Palestino manipod kadagiti daga da tapno maibangon ti estado ti “Israel”. Papairtengen ti umili iti sangalubongan dagiti panagtignay maibusor iti Zionista nga Israel iti sangoanan ti di agressat a panagbomba ken panangraot na idiay Gaza. Karaman ditoy ti panagrang-ay dagiti protesta dagiti estudyante iti nasurok 100 a dadakkel nga unibersidad idiay US, kasta met idiay France ken Australia.

Sigun kadagiti nagprotesta, ti agdama a panangpapatay idiay Gaza ket dakdakes ngem ti Nakba idi 1948 isu a masapol nga agtultuloy nga agtignay dagiti umili iti intero a lubong a mangpasardeng iti dayta.

Manipod idi Oktubre 7,2023, nasuroken a 38,000 Palestino ti pinapatay ti US-Israel idiay Gaza, ken nasuroken a 2 milyon ti naawanan ti pagtaengan ken napapanaw kadagiti komunidad da.