Gapo kadagiti natural a kinabaknang ti probinsya ti Batangas ken ti bentahe a pwesto na iti pagilian ken rehiyon, ado a negosyante ken ganggannaet ti agkatkatay kadaytoy.

Sumagmamano a tawenen a karaisao ti reaksyonaryo nga estado ti panagkissay ti panagsanggir iti fossil fuel (langis ken karbon) kas gubuayan ti enerhiya ti pagilian. Iti sidong ti turay ni Duterte, nangrugin ti pagilian a nanglukat kadagiti ganggannaet a pamastrekan iti renewable energy (saan a naibatay iti langis ken karbon) ken nadalus (saan a mangpataud iti polusyon wenno rugit). Iti sidong ti turay ni Marcos, pinalubosanna ti 100% a panagtagikua ti ganggannaet kadagiti kasdiay a pasilidad.

Umiso ken nainkalintegan ti panagregget ti ado a sektor ti kagimongan a mangusar iti nadalus nga enerhiya tapno masalakniban ti lubong manipod iti panagbalbaliw ti klima. Ngem saan a dayta ti panggep dagiti ganggannaet a korporasyon ken dagiti burgesya kumprador a kasosyo da, agraman dagiti burukrata-kapitalista, a sipapardas a naggunay iti panagrang-ay iti renewable energy.

Iti intero a pagilian, sumagmamano laeng a pamilya ken kumpanya ti agik-ikut kadagiti planta a mangpataod ken mangipaay iti kuryente, usar ti angin, danum, karbon, ken liquefied natural gas (LNG). Idiay Batangas City, adda pasilidad dagiti Ayala ken Aboitiz ken dagiti negosyante a da Manny V. Pangilinan (MVP), Ramon Ang ken Enrique Razon Jr. Ti anak ni Sen. Loren Legarda a ni Leandro Leviste nga akinkukua ti Solar Philippines Power Project Holdings Inc. (SPPPHI) ket adda met ditoy. Ti pamilya a Tan ti agtagikua iti Citicore Solar Power Plant idiay Tuy a mangsuplay iti kuryente iti Emperador ken ti Tanduay Distillery idiay Balayan ken Lian.

Idi 2016, nangipatakder ni Leviste iti kaunaan a solar farm ti SPPPHI iti 160 ektarya a katanapan idiay Calatagan. Idi 2023, ginatang da Razon ken Leviste ti dua pay a solar farm idiay Batangas. Panggep da a bangonen ti kadakkelan a solar farm iti intero a probinsya, a sakupenna ti Nueva Ecija ken Bulacan.

Idi Disyembre 2023, impakaammo ni Pangilinan ti pannakalugi ti Roxaco Land Corporation idiay Nasugbu. Kabayatanna, nairaman ti pannakaserra ti Central Azucarera Don Pedro Inc (CADPI)—maysa kadagiti dua nga asukarera iti probinsya ken maikadua a kadakkelan iti pagilian.

Iti tawen 2024, naibutaktak ti makagapo iti desisyon ni Pangilinan a nangdadael iti pagbiagan ti rinibribo a Batangueño nga agun-unas. Impakaammo na idi Marso a ginatang na ti Solar Phil New Energy Corporation (SPNEC), maysa a kumpanya iti sidong ti SPPPHI ni Leviste. Kasukat daytoy, inlako na ti ROXACO ken ni Leviste. Kaykayat ni Leviste ti nalawa ken tanap a kaunasan ti Hacienda Roxas para kadagiti solar farms na.

Bigbigbigen dagitoy a burgesya ti tarigagay a mangpataod iti nalaka a kuryente para iti pagilian ngem ti agpayso ket ti kasumbangir na. Ngimmato ti presyo ti kuryente gapo ta adda sumagmamano a tattao a mangtengtengngel iti dayta. Ti mangkontrol iti suplay ti mangkontrol met iti pannakaiwaras.

Rinibo a mannalon ken mangngalap ti mapapanaw kadagiti lugar da gapo laeng iti planta ken pasilidad da. Karaman kadagitoy ti 26,000-ektarya a geothermal powerplant ti Aboitiz idiay San Juan, Lobo, Rosario ken Taysan, ti 10,000-ektarya a solar farm da Leviste ken Razon iti makinlaud a paset ti Batangas.

Sumrek pay iti eksena ti plano ti Basic Energy a wind powerplant a mangsakop iti 2,835-ektarya a daga iti igid ti baybay ti Balayan ken Calatagan a kukua ni Ramon Villavicencio. Kasta met laeng a planta ti plano ti Philippine National Oil Company a maipasdek iti mismo a tengnga ti baybay idiay Mabini.

Babaen ti pannagi-innuna dagitoy a kumpanya a mangibangon kadagiti bukod da a pasilidad, pinukaw da ti pagimbagan ti nakaad-ado a Batangueño a napapanaw kadagiti pagtaengan, daga, ken pagsapulan da. Ad-adda pay a madadael ti aglawlaw gapo iti di responsable a panagtibbag iti igid ti baybay ken ti pannakarugit dagiti danum iti Verde Island Passage.