Isubli ti 5-tawen a franchise! Nagprotesta dagiti mano gasot a drayber ken opereytor ti dyip idi Mayo 16 iti sangoanan ti LTFRB idiay Quezon City tapno kondenarenn ti bilin a tiliwen dagiti saan nga agpasakop iti maipapilit a konsolidasyon dagiti prangkisa. Inrupir dagiti drayber ken opereytor a maisubli ti 5-tawen nga indibidwal a prangkisa da para iti pagbiagan da. Idi Mayo 14, nagprotestada met iti sango ti Korte Suprema tapno iduron ti korte a mangipaay iti sungbat iti petisyon da a mangpasardeng iti kapilitan a pannaka-urnos ken pannaka-ipatungpal ti PUVMP.

Lider-mangmangged ti KMU-SMR, binirok iti kampo-militar. Dagiti kabagian ni William Larosa, nadukot a lider-mangmangged idiay Southern Mindanao, ket nagirussuat ti search mission idi Mayo 14. Nagturong d iti kampo ti 103rd IBde idiay Davao City gapo iti tip a sadiay ti nangilemmengan ken Lariosa. Napanda met iti regional office ti CHR ken ti DOLE idiay Davao City tapno iyumang da ti kaso ti nadukot a lider.

Aldaw ti Mangmangged pangsalun-at, linagip. Nagmartsa dagiti mangmangged pangsalun-at idi Mayo 7 idiay Manila ken Baguio City. Kiddaw da ti makabiag a sweldo, kinatalged iti trabaho, nayon a taw-an iti ospital, kalintegan iti trabaho ken kalintegan ti umili a Pilipino iti salun-at. Nanglukat da met kadagiti protesta ken dadduma pay nga aktibidad kadagiti syudad ti Iloilo, Bacolod, ken Cebu, iti Camarines Norte, ken kadagiti rehiyon ti Soccsksargen ken BARMM. Dagiti Health Workers United for Wage Increase ken Alliance of Health Workers ti nangidaulo kadakuada.

Dagiti trabahador ti PLDT, agwelga. Nagbotos ti 3,390 kadagiti 4,041 a nakaykaysa a trabahador ti PLDT a pabor iti panagwelga iti sango ti saan a panagtignay ti maneydsment iti panagawag da a manglukat ti negosasyon a CBA para iti 2024-2027. Inrugi da ti strike vote wenno panagbotos nga agwelga idi Mayo 14 ken 15 kadagiti amin a sanga ken opisina ti PLDT iti pagilian. Tallo a bulanen a nangipaulog ti unyon iti pammilin para iti negosasyon ngem awan ti sungbat ken inggagara nga intantan ti kumpanya ti pannakairugi na. Nagprotesta da met iti DOLE idiay Intramuros, Manila idi Mayo 13.

73-ektarya a daga idiay Angeles City, ilaban. Nagpiket dagiti mannalon ken residente manipod iti Barangay Anunas, Angeles City, Pampanga iti DAR ke Kongreso idi Mayo 13 ken 14. Kayat da a maisubli ti 73-ektarya a daga iti Sityo Balubad a tinagikua ti Clark Hills Properties Corporation. Mangipatulod iti resolusyon iti Kongreso a mangusig iti panangsamsam iti daga.