Indi abyan sang mga Pilipino ang imperyalistang US. Nagprotesta ang mga pamatan-on nga Pilipino sa pagpanguna sang Youth for Justice and Peace sadtong Hulyo 4, “Filipino-American Friendship Day,” lapit sa embahada sang US sa Manila. Ginkundenar nila ang gyera nga agresyon sang US sa Asia-Pacific kag ang padayon nga pangibabaw sini sa Pilipinas.

RIMPAC, peste sa pumuluyo. Masobra 600 ka aktibista halin sa International Cancel RIMPAC Campaign ang nagmartsa sa San Diego, California sa US sadtong Hunyo 30 para ipanawagan ang pagkansela sa Rim of Pacific war games nga nagakahitabo sa Hawaii kag mga kadagatan sini halin Hunyo 27 tubtob Agosto 2. Isa ka adlaw antes sini, ginlunsar nila ang Cancel Rimpac 2024 Summit.

Paandam sang welga sa Nexperia. Nagpasaka sang Notice of Strike (NOS) ang mga mamumugon sa idalom sang Nexperia Philippines Inc. Workers Union sadtong Hunyo 26 sa National Conciliation and Mediation Board Region IV-A sa Calamba, Laguna. Kadungan sini, naglunsar sang rali ang mga mamumugon. Nagdesisyon ang unyon nga magpasaka sang NOS tungod sa indi makitawhanon nga mga kundisyon sa pamugon kag paglapas sang manedsment sa collective bargaining agreement.

Pagpanagtag ni Marcos Jr sang ayuda sa Negros, ginkadlawan. Ginsugata sang protesta sang mga progresibo nga grupo ang pagbisita ni Ferdinand Marcos Jr kag iya nga asawa nga si Liza Araneta Marcos sa Bacolod City sadtong Hunyo 26. Natalana sadto nga managtag sang ₱10,000 sa masobra 8,000 ka mangunguma nga apektado sang El Niño sa Negros Occidental. Gintawag sang mga ralyista nga “band-aid” sa mga problema sa Negros ang ginagmay nga ayuda kag ang pagpanagtag sini isip “pogi points” sang mga Marcos.

Ika-4 ka tuig sang Anti-Terrorism Act. Nagpadulong sa Department of Justice ang Bayan sadtong Hulyo 3 para iduso ang pagbasura sa tanan nga mga laye may kaangtanan sa terorismo kag pagpondo sang terorismo nga ginpasaka sang departamento batuk sa mga aktibista kag tigpangapin sang tawhanon nga kinamatarung gamit ang mga ini. Gintuon ang hublag sa ika-4 nga anibersaryo sang mapanumpo nga ATA.

Ika-30 nga anibersaryo sang Stonewall Manila. Gindumdom sang grupo nga Bahaghari sadtong Hunyo 26 ang ika-30 nga anibersaryo sang Stonewall Manila, ang pinaka-una nga martsa nga ginpangunahan sang mga agi kag tomboy sa Pilipinas kag sa bilog nga Asia. Naghalin ang okasyon sa Stonewall Riots nga nahitabo sa New York sadtong 1969 nga ginkabig nga yabi nga panghitabo sa pagbuylo sang kahublagan para sa mga kinamatarung sang mga komunidad sang LGBT. Nagkalain-lain nga aktibidad man ang ginlunsar sang mga grupo nga LGBT sadtong ulihi nga semana sang Hunyo bilang kahiwatan sa bulan sang Pride kag pagpangapin batuk sa diskriminasyon sa sektor.