Saan a gayyem dagiti Pilipino ti imperyalista a US. Nagprotesta dagiti agtutubo a Pilipino iti panangiyuna ti Youth for Justice and Peace idi Hulyo 4, “Filipino-American Friendship Day,” asideg iti embahada ti US iti Manila. Kinundenar da ti gera nga agresyon ti US iti Asia-Pacific ken ti agtultuloy a panangrimbaw na iti Pilipinas.

RIMPAC, didigra iti umili. Nasurok 600 aktibista manipud iti International Cancel RIMPAC Campaign ti nagmartsa iti San Diego, California idiay US idi Hunyo 30 tapno ipakansela ti Rim of Pacific war games a mapaspasamak iti Hawaii ken iti kabaybayan daytoy manipud Hunyo 27 agingga Agosto 2. Maysa nga aldaw sakbay daytoy, insayangkat da ti Cancel Rimpac 2024 Summit.

Pangta ti welga iti Nexperia. Nagiyuli ti Notice of Strike (NOS) dagiti mangmangged iti sidong ti Nexperia Philippines Inc. Workers Union idi Hunyo 26 iti National Conciliation and Mediation Board Region IV-A iti Calamba, Laguna. Kagiddan daytoy, nagiyaramid ti rali dagiti mangmangged. Nagdesisyon ti unyon nga agidatag ti NOS gapu iti saan a makatao a kundisyon iti trabaho ken panaglabsing ti maneydsment iti collective bargaining agreement.

Panangiwaras ni Marcos Jr ti ayuda iti Negros, naumsi. Sinabat ti protesta dagiti progresibo a grupo ti panagbisita ni Ferdinand Marcos Jr. ken ti asawa na a ni Liza Araneta Marcos iti Bacolod City idi Hunyo 26. Nakaituding ni Marcos idi nga agiwaras ti ₱10,000 iti nasurok 8,000 a mannalon nga apektado ti El Niño iti Negros Occidental. Inawagan dagiti raliyista a “band-aid” kadagiti problema iti Negros ti nakabasbassit nga ayuda ken ti panangibunong ditoy kas “pogi points” dagiti Marcos.

Maika-4 a tawen ti Anti-Terrorism Act. Nagturong iti Department of Justice idi Hulyo 3 tapno irupir ti panangibasura iti amin a linteg kanaig iti terorismo ken panangpondo ti terorismo nga inyuli ti departamento laban kadagiti aktibista ken salaknib ti karbengan-tao babaen kadagitoy a linteg. Inangay da ti tignay iti maika-4 nga anibersaryo ti mangirurumen nga ATA.

Maika-30 anibersaryo ti Stonewall Manila. Linagip ti grupo a Bahaghari idi Hunyo 26 ti maika-30 anibersaryo ti Stonewall Manila, ti kaunaan a martsa nga inyuna dagiti bakla ken lesbian iti Pilipinas ken iti intero nga Asia. Naadaw ti okasyon iti Stonewall Riots a napasamak iti New York idi 1969 a maibilbilang a napateg a pasamak iti panagbwelo ti tignay para kadagiti karbengan dagiti kabilang iti komunidad ti LGBT. Nadumaduma nga aktibidad met ti insayangkat dagiti grupo ti LGBT idi naudi a lawas ti Hunyo kas panangrambak iti bulan ti Pride ken panangsalaknib laban iti diskriminasyon iti sektor.