Dili higala sa mga Pilipino ang imperyalistang US. Nagprotesta ang mga kabatan-onang Pilipino sa pagpasiugda sa Youth for Justice and Peace niadtong Hulyo 4, “Filipino-American Friendship Day,” duul sa embahada sa US sa Manila. Gikundena nila ang gubat agresyon sa US sa Asia-Pacific ug ang padayon nga pagdominar niini sa Pilipinas.

RIMPAC, dangan sa katawhan. Kapin 600 ka aktibista gikan sa International Cancel RIMPAC Campaign ang nagmartsa sa San Diego, California sa US niadtong Hunyo 30 aron ipanawagan ang pagkansela sa Rim of Pacific war games nga ginapahigayon sa Hawaii ug sa mga kadagatan niini gikan sa Hunyo 27 hangtud Agosto 2. Usa ka adlaw ayha niini, gilunsad nila ang Cancel Rimpac 2024 Summit.

Hulga sa welga sa Nexperia. Nagpasaka og Notice of Strike (NOS) ang mga mamumuo ubos sa Nexperia Philippines Inc. Workers Union niadtong Hunyo 26 sa National Conciliation and Mediation Board Region IV-A sa Calamba, Laguna. Dungan niini, nagpahigayon og rali ang mga mamumuo. Nakadesisyon ang unyon nga magsumite og NOS tungod sa dili makatawhanong mga kondisyon sa pagtrabaho ug paglapas sa maneydsment sa collective bargaining agreement.

Pagpanghatag ni Marcos Jr og ayuda sa Negros, gitamay. Gisugat og protesta sa mga progresibong grupo ang pagbisita ni Ferdinand Marcos Jr ug sa iyang asawa nga si Liza Araneta Marcos sa Bacolod City niadtong Hunyo 26. Nakatakda kaniadto si Marcos nga manghatag og ₱10,000 sa kapin 8,000 ka mag-uuma nga naapektuhan sa El Niño sa Negros Occidental. Gitawag sa mga raliyista nga “band-aid” nga solusyon sa mga problema sa Negros ang gamayng ayuda ug ang pagpanghatag niini isip “pogi points” sa mga Marcos.

Ika-4 nga tuig sa Anti-Terrorism Act. Miadto sa Department of Justice ang Bayan niadtong Hulyo 3 aron ipasiugda ang pagbasura sa tanang mga balaod kalabot sa terorismo ug pagpondo sa terorismo nga gipasaka sa departamento batok sa mga aktibista ug tigpanalipud sa tawhanong katungod gamit kini. Gipahiuyon ang protesta sa ika-4 nga anibersaryo sa mapanumpuong ATA.

Ika-30 anibersaryo sa Stonewall Manila. Gihandum sa grupong Bahaghari niadtong Hunyo 26 ang ika-30 nga anibersaryo sa Stonewall Manila, ang unang martsa nga gipangulohan sa mga bayot ug tomboy sa Pilipinas ug sa tibuok Asia. Gikutlo ang okasyon gikan sa Stonewall Riots nga nahitabo sa New York niadtong 1969 nga giilang importanteng panghitabo sa pagbwelo sa kalihukan alang sa mga katungod sa mga anaa sa komunidad sa LGBT. Lain-laing aktibidad usab ang gilunsad sa mga grupong LGBT niadtong katapusang semana sa Hunyo isip selebrasyon sa bulan sa Pride ug pagpanalipud batok sa diskriminasyon sa sektor.