Gikabalak-ang labaw nga moulbo ang todo-gera tali sa Zionistang Israel ug grupong Hezbollah sa Lebanon human sa gipagrabeng pag-atake sa Israel sa Habagatan sa Lebanon sa miaging bulan. Gideklara ni Prime Minister Benjamin Netanyahu sa Israel nga nangandam kini sa “grabeng operasyon” batok sa Hezbollah. Human niini, nagbahad ang iyang ministro sa depensa nga si Yoav Gallant nga kaya kaayo niyang “ibalik sa karaang panahon ang Lebanon,” sama sa walay katugbang nga pagpulbos niini sa Gaza Strip.

Gitubag kini sa hepe sa Hezbollah nga nag-ingon nga andam ang Lebanon nga manalipud kung moatake ang Zionistang estado. Ang Hezbollah mao ang usa ka armadong organisasyon sa mga Lebanese nga dugay nang nakigbatok sa imperyalismong US ug Zionismo sa Israel. Nag-unang nakabase kini sa Habagatan sa Lebanon, kung asa kini ang nagharing partido. Ang Lebanon mao ang nasud sa amihanan sa teritoryong giangkon sa Israel.

Ginatarget sa Israel ang Hezbollah tungod sa pag-atake niini sa Amihanan sa Israel isip kabahin sa pagpanalipud sa mga Palestino nga giatake sa Gaza Strip. Gisugdan sa Hezbollah ang ilang pag-atake niadtong Oktubre 8, 2023.

Sa miaging bulan, gipagrabe sa Israel ang pag-atake sa Hezbollah. Gipamatay niini ang duha ka upisyal militar ug kumander sa grupo niadtong Hunyo 11 (Taleb Sami Abdullah) ug Hulyo 3 (Muhammad Nimah Nasser) sa ilang mga pag-atake gikan sa kahanginan. Isip balos, nagbuhi ang Hezbollah og gatusan ka rocket batok sa militar sa Israel. Gigamit usab sa grupo ang mga bombang drone. Nagsaad usab ang grupo nga “pagrabehon, pakusgon, padaghanon ug palig-onon ang mga pag-atake.”

Kaaway na sa estado sa Israel ang Lebanon sukad nga giilog sa mga Zionista ang kayutaan sa mga Palestino. Niadtong gideklara ang pagtukod sa estado sa Israel niadtong 1948, lakip ang Lebanon sa pito ka nasud sa Middle East nga nakiggyera batok sa Zionismo ug pagsuporta dinhi sa US. Gipangulohan sa Hezbollah ang 18-ka tuig nga armadong pakigbisog (1982-2000) batok sa pagpanakop sa Israel sa Habagatan sa Lebanon. Subling giatake sa Israel ang Hezbollah niadtong Hulyo-Agosto 2006. Maisugon nga nakapanalipud ang Hezbollah sa 34-ka adlaw nga gyera ug napaatras ang Israel.

Atubangan sa hulga sa pag-ulbo sa gyera, nagpahimangno ang representante sa humanitarian affairs sa United Nations nga mahimong “apocalyptic” kini. Ang pakiggyera sa Israel sa Lebanon mopugos sa mga nasud sa Middle East nga manalipud.

Nagpakaaron-ingon karon ang imperyalistang US ug ang mga upisyal niini, lakip ang mga kaalyado niini sa Europe, nga pahunungon ang nagkalapad nga gyera sa Middle East. Apan sa tinuod, walay hunong ang US ug mga kaalyado niini sa pagsuporta ug pagsuplay og armas sa pagpanakop ug henosidyo sa Israel sa Gaza ug armadong pag-atake niini sa ubang nasud sa rehiyon.

Alang sa mga Palestino

Klaro nga gideklara sa Hezbollah ug mga lider sa grupo nga mohunong lamang sila sa pag-atake kung magpatuman og hunong-buto ang Israel sa Gaza. Ingon niini usab ang tumong sa grupong Houthi gikan sa Yemen nga nag-atake sa mga barkong Israeli o padulong sa Israel nga nagaagi sa Red Sea. Miabot na sa 162 ka barko ang giatake niini sukad nga gigyera sa Israel sa Gaza.

Atubangan niini, walay hunong ang mga airstrike, pagpamomba ug pagpangatake sa Israel sa tibuok Gaza. Wala niini gitahod bisan ang gideklarang “luwas nga mga sona.”

Niadtong Hulyo 1 lamang, pugos nga gipalayas sa Israel ang mga 250,000 ka Palestino gikan sa Khan Younis, sa Habagatan sa Gaza. Niadtong Hulyo 3, siyam ka Palestino ang napamatay sa airstrike sa Israel sa kabalayan duul sa European Hospital sa lugar.

Ang mga taga-Khan Younis mga Palestino nga napalayas gikan sa pagpamomba sa Israel sa Rafah, nga gitakdang “luwas nga sona.” Subli silang gipabakwit ngadto sa “humanitarian zone” sama sa al-Masawi nga giatake sa Israel niadtong Hunyo 21 kung asa 25 ang namatay ug nagtukmod sa liboan nga mobakwit padulong sa Khan Younis.

Sa ulahing rekord niadtong Hulyo 3, miabot na sa 37,953 ang gipamatay sa Israel sa Gaza samtang 87,266 ang nasamdan gikan sa Oktubre 7, 2023. Nataho usab sa West Bank ang 561 ka biktima sa pagpatay ug 5,300 ang nasamdan. Kasamtangang gipriso sa Israel ang 9,300 ka Palestino kung asa 3,450 ang walay kaso.