Umad-adani ti ad-adda a panaggil-ayab ti todo-gera iti baet ti Zionista nga Israel ken grupo a Hezbola ti Lebanon kasaruno ti rimmungsot a panag-atake ti Israel iti abagatan a Lebanon iti napalabas a bulan. Indeklara ni Prime Minister Benjamin Netanyahu ti Israel nga agisagsagana daytoy ti “napigsa nga operasyon” laban iti Hezbollah. Kasaruno daytoy, nagpangta ti ministro na iti depensa a ni Yoav Gallant a kabaelan na nga “isubli iti agkakauna a panawen ti Lebanon,” kas ti awan-katukad na a panangpulbos daytoy iti Gaza Strip.

Sinungbatan daytoy ti hepe ti Hezbollah a nagkuna a nakasagana nga agdepensa ti Lebanon nu umatake ti Zionista nga estado. Ti Hezbollah ket maysa nga armado nga organisasyon dagiti Lebanese a nabayagen a lumablaban iti imperyalismo a US ken Zionismo ti Israel. Kangrunaan a nakabase daytoy iti abagatan a Lebanon, nu sadinno a daytoy ti agar-ari a partido. Ti Lebanon ket pagilyan nga adda iti amianan ti teritoryo nga ik-ikutan ti Israel.

Punpuntiryaen met ti Israel ti Hezbollah gapu iti panangisayangkat daytoy kadagiti panagatake iti amianan nga Israel kas paset ti panagdepensa dagiti Palestino a mararaut iti Gaza Strip. Rinugian ti Hezbollah ti panagatake da idi Oktubre 8, 2023.

Iti napalabas a bulan, pinapigsa ti Israel ti panagatake na iti Hezbollah. Pinapatay daytoy ti dua nga upisyal militar ken kumander ti grupo idi Hunyo 11 (Taleb Sami Abdullah) ken Hulyo 3 (Muhammad Nimah Nasser) kadagiti airstrike na. Kas panangbales, nagiparuk-at ti mano gasut a rocket ti Hezbollah laban iti militar ti Israel. Nagusar met ti grupo kadagiti bumbumtak a drone. Nagkari met ti grupo a “papigsaen, paaduen ken pangatuen na ti kalidad dagiti panagatake.”

Kabusoren ti estado nga Israel ti Lebanon manipud idi kinamkam dagiti Zionista ti dagdaga dagiti Palestino. Idi naideklara ti panangibangon ti estado ti Israel idi 1948, kabilang ti Lebanon iti pito a pagilyan iti Middle East a nagisayangkat ti gera laban iti Zionismo ken panangsuporta ditoy ti US. Indauluan ti Hezbollah ti 18-tawen nga armado a panaglaban (1982-2000) iti panagsakop iti Israel iti abagatan a Lebanon. Balbaliw a rinaut ti Israel ti Hezbollah idi Hulyo-Agosto 2006. Nabanwar a nakapagsalaknib ti Hezbollah iti daytoy a 34-aldaw a gera ken napaatras na ti Israel.

Iti sango ti pangta ti panagbettak ti gera, nagpatigmaan ti mangibagi iti makatao a saritaan ti United Nations a daytoy ket posible nga agbalin a “kanibusanan ti lubong” (“apocalyptic”). Guyoden kano ti pannakigubat ti Israel iti Lebanon dagiti pagilyan iti Middle East.Aginkukuna tatta ti imperyalista a US ken dagiti upisyal na, uray met dagiti alyado na a pagilyan iti Europe, a pakalmaen ti sumaksaknap a risiris iti Middle East. Ngem iti aktwal, awan sarday ti US ken dagiti alyado na iti panagsuporta ken panagisuplay ti armas iti gera iti panagsakop ken henosidyo ti Israel iti Gaza ken armado a panagatake na iti sabali a pagilyan iti rehiyon.

Para kadagiti Palestino

Nalawag nga indeklara ti Hezbollah ken dagiti lider ti grupo nga isardeng da laeng dagiti panagatake nu ipatungpal ti Israel ti ceasefire iti Gaza. Kastoy met laeng ti panggep ti grupo a Houthi manipud iti Yemen nga agisaysayangkat ti panagatake laban kadagiti barko nga Israeli a lumaslasat iti Red Sea. Dimmanonen iti kabuklan a 162 a barko ti inatake daytoy manipud idi gubaten ti Israel ti Gaza.

Iti sango daytoy, awan-sarday dagiti airstrike, panagbomba ken panag-atake ti Israel iti intero a Gaza. Saan nan a palpalabsen uray pay dagiti indeklara na a “natalged a sona.”

Idi laeng Hulyo 1, inkapilitan a pinapanaw ti Israel ti umabot iti 250,000 a Palestino manipud iti Khan Younis iti abagatan ti Gaza. Idi Hulyo 3, siyam a Palestino ti napapatay iti airstrike ti Israel iti kabalbalayan asideg iti European Hospital iti lugar.

Dagiti adda iti Khan Younis ket dagiti Palestino a napadisi manipud iti panagbombomba ti Israel iti kaabay a Rafah a naituding a “natalged a sona.” Balbaliw a mapabpabakwit da agturong kadagiti “makatao a sona” kas ti al-Masawi nga inatake ti Israel idi laeng Hunyo 21 nu sadinno a 25 ti napapatay ken nangiduron iti rinibo nga umakar agturong iti Khan Younis.

Iti maudi a rekord idi Hulyo 3, dumanonen iti 37,953 ti pinapatay ti Israel iti Gaza bayat 87,266 ti nasugatan manipud Oktubre 7, 2023. Naimaldit met iti West Bank ti 561 a biktima ti pammapatay ken 5,300 ti nadunor. Madama nga ibalbalud ti Israel ti 9,300 a Palestino nu sadinno a 3,450 ket awanan kaso.