Pito ka kaso na ang nabasura nga may kalabutan sa pagbawi sa kinawat nga bahandi sa pamilyang Marcos sukad nga makalingkod si Ferdinand Marcos Jr sa poder. Gibanabanang ₱2.3 bilyon nga kinawat nga bahandi ang nabawi sa mga Marcos gikan sa maong mga kaso. Gikundena kini sa mga biktima sa balaod militar ug mga demokratikong organisasyon.

Pinakabag-o sa maong kasong napabasura sa mga Marcos mao ang may kalabutan sa yuta ug balay sa Pilipinas ug US nga nagkantidad og ₱276 milyon. Gibasura kini sa Sandiganbayan niadtong Oktubre 4 tungod kay dugay na kaayo kining natanggong sa korte. Pakyas ang prosekusyon nga iduso ang kaso sulod sa milabayng 37 ka tuig.

Adunay kinatibuk-ang 28 ka kasong kriminal ug 43 ka kasong civil ug forfeiture ang gipasang-at batok sa mga Marcos sa Sandiganbayan gikan 1986 hangtud 1995.