Nabulabog ang nag-operasyong tropa sa 79th IB human sila gipabuthan sa mga Pulang manggugubat sa Bagong Hukbong Bayan (BHB)-Northern Negros (Roselyn Jean Pelle Command) sa Sityo Agtatahor 1, Barangay Macasilao, Calatrava, Negros Occidental niadtong Oktubre 6. Gihimo ang operasyong haras sa alas-9 sa buntag samtang nag-andam og pamahaw ang mga sundalo.

Sumala sa report sa yunit, hilum silang nakaduul sa yunit sa 79th IB samtang maayong nagkakamoplahe. Ang gipabuthang tropa sa 79th IB kabahin sa usa ka malukpanong focused military operations sa maong lugar. Kadungan usab niini ang usa ka Retooled Community Support Program (RCSP) nga usa ka elemento sa operasyong saywar sa militar.

Sakop sa operasyong kombat ang dili moubos sa 10 ka barangay sa lungsod sa Calatrava. Kini mao ang Macasilao, Hilub-ang, Hinab-ongan, Lagaan, Minautok, Cambayobo, Marcelo, Minapasok, Malatas ug Pantao.