Niadtong Oktubre 15, gianunsyo sa US nga magpadala kini og mga sistemang Terminal High-Altitude Area Defense (THAAD) ug 100 ka Amerikanong sundalo sa Israel, isip pagpangandam kuno sa posibleng atake gikan sa Iran. Kini nahitabo samtang kanunay ginayawyaw sa ipokritong presidente niining si Joseph Biden ang “deescalation” o pagpalugdang sa tensyon sa rehiyon nga gibunga sa agresyon sa Israel sa Lebanon ug nagapadayong henosidyo niini sa Gaza.

Gipadala sa US ang mga armas para sa Israel sa panahon nga labaw pang nahimong linuog ang mga krimen niini sa gubat ug krimen batok sa katawhan sa Gaza, West Bank ug Lebanon. Lakip sa labing bag-ong makalilisang nga krimen niini ang pagbomba sa usa ka tent city sa mga bakwit sa Deir al-Balah sa tunga-tungang bahin sa Gaza Strip niadtong Oktubre 14. Nasunog nga buhi ang dili moubos sa upat ka pasyenteng gibalhin sa lugar, human silang napugos nga mobakwit gikan sa kasikbit nga ospital nga una nang gibomba sa Israel. Pipila ka oras ayha niini, gibomba sa Israel ang usa ka eskwelahan nga ginasilungan sa mga bakwit sa amihanang Gaza, kung asa 22 ang napatay, 15 kanila mga bata. Sa Jaballah, gibomba sa Israel ang mga Palestinong nakapila alang sa ayudang harina. Napulo ang dihadiha nga napatay.

Mikabat na sa 42,603 ang gipatay sa Israel sa Gaza, 700 sa West Bank hangtud 2,309 na ang gipatay niini sa Lebanon. Sa Lebanon, usa sa pinakagrabeng krimen ang paghulog sa Israel sa 80 ka bomba sa mga komunidad sa Beirut nga mipatay sa general secretary sa grupong Hezbollah nga si Hassan Nasrallah niadtong Setyembre 27. Unum ka bilding ang gipulbos sa mga bomba kung asa 33 lain pa ang napatay. Ang serye sa pagpamomba nagpalayas na sa 1 milyong katawo, lakip ang 400,000 ka bata. Niadtong Oktubre 1, hingpit nga giatake sa mga tropa sa Israel ang habagatang bahin sa Lebanon kung asa giatubang sila sa mga tropang Hezbollah. Lakip sa tinuyo ug subli-subli nga ginaatake sa mga tropa sa Israel ang kampo sa United Nations Interim Force in Lebanon o UNIFIL. Migamit ang Israel sa gibawal nga mga cluster bomb ug white phosphorous aron siguruhong lapad ug brutal ang epekto sa mga bomba niini sa mga sibilyan.

Taliwala niini, gipakusog sa mga pwersang Hezbollah ang pagpanalipud sa ilang soberanya ug katawhan. Gatusan ka manggugubat niini ang miatubang sa 70,000 ka tropa, mga tangke ug pagpamomba sa ere nga gigamit sa Israel sa sulayng sudlon ang habagatang bahin sa Lebanon gikan Setyembre 30. Dakung hampak ang gibuhian sa Hezbollah sa nagaabanteng mga tropa, ingonma sa mga kampo ug pwestong militar sa lain-laing bahin sa Israel. Sama sa mga pwersa sa Hamas sa Palestine, andam ang Hezbollah sa dugay ug maduguong gubat atrisyon batok sa mga pwersang mananakop sa US-Israel.

Sa taho sa militar sa Lebanon, dili moubos sa siyam ka tangke nga nagsulayng mosulod sa nasud ang napabusikad sa mga pwersa niini gikan Oktubre 1. Anaa sa 55 ka tropang Israeli ang napatay, ug kapin 500 ang nasamdan. Napabusikad usab niini ang duha ka drone nga Hermes 450 samtang milupad pasulod sa Lebanon.

Matag adlaw, ug halos kada oras, nagpalupad og gatusan ka rocket ang Hezbollah nga nagatarget sa mga kampo ug pusisyong militar aron himuong inutil ang giilang Iron Dome, ang sistemang pangdepensa sa Israel nga hingpit nga ginapondohan sa US. Daghan sa mga rocket sa Hezbollah ang miigo sa ilang mga target. Niadtong Oktubre 13, malampuson ang usa ka drone strike niini sa usa ka kampo militar sa Haifa kung asa upat ka sundalong Israeli ang napatay ug 67 ang nasamdan. Kini nga mga atake susama sa mga atakeng misayl sa Iraq niadtong Oktubre 1 nga miigo sa hedkwarters sa Mossad, ahensyang paniktik sa Israel sa tunga-tunga sa Tel Aviv. Dili sama sa Israel, mga lehitimong target militar lamang ang giatake sa Lebanon ug sa Iran.