Duterte, ginapapanubag sa gyera kontra-droga. Nagprotesta ang mga myembro sa Bayan Muna atubangan sa kongreso niadtong Oktubre 11 dungan sa pagdungog dinhi mahitungod sa ekstra-hudisyal nga pagpamatay ilalum sa kanhing rehimeng Duterte. Uban ang mga pamilya sa mga biktima sa “gyera kontra-droga,” nanawagan sila og hustisya ug pagpanubag kang Duterte ug sa uban pang nalambigit sa dinaghang pagpatay.

Negosasyon alang sa CBA sa Technol Eight, gipanghingusog. Gikan sa ulahing semana sa Setyembre, pito ka hugna nang nagprotesta ang Technol Eight Philippines Workers Union-OLALIA-Kilusang Mayo Uno aron iduso ang pagpadayon sa negosasyon alang sa bag-ong collective bargaining agreement (CBA). Pinakabag-o dinhi ang protesta niadtong Oktubre 16 ug 17 sa pabrika sa Biñan, Laguna.

Piket sa Paperland. Gikundena sa unyon sa mga mamumuo sa Paperland ang iligal nga shutdown ug pagpamig-ot sa maneydsment sa lider niining si Renato “Rey” Ayroso. Nagpiket ang mga mamumuo atubangan sa pabrika niini sa Quezon City niadtong Oktubre 17 aron kundenahon ang mga pagsulay nga bungkagon ang ilang unyon ug mga maniubra aron palagputon si Ayroso. Ang Paperland usa ka kumpanyang nagahimo og papel.

Barikada batok sa demolisyon, gitukod sa Laguna. Gitukod sa mga residente sa Barangay Nueva, San Pedro, Laguna ang barikada sa ikatulong semana sa Oktubre batok sa bantang demolisyon sa Philippine National Railways (PNR) ug lokal nga gubyerno sa ilang pagpasagad. Walay mapakitang dokumento alang sa demolisyon ang PNR ug wala usay nakaandam nga plano alang sa relokasyon ang gubyerno sa San Pedro.

Kontra-minang protesta, gilunsad sa Romblon. Niadtong Setyembre 22, kapin usa ka libong Sibuyanon ang subling nagkahiusa ug nagtapok sa usa ka protesta kontra-mina sa San Fernando, Sibuyan Island, Romblon. Kabahin kini sa nagapadayong pagbatok sa mga residente sa isla sa magun-ubong mina sa Altai Philippines Mining Corporation nga gipanag-iyahan sa pamilyang Gatchalian.

Hustisya para kang Jennifer Laude! Gilunsad sa mga grupo sa kabatan-onan ang mga protesta ug aktibidad niadtong Oktubre 11 isip pagdumdum sa ika-10 nga anibersaryo sa pagpatay ni Lance Corporal Joseph Scott Pemberton sa US Marines kang Jennifer Laude. Adunay aktibidad sa University of the Philippines (UP)-Diliman, sa atubangan sa Technological University of the Philippines ug sa UP Mindanao. Naglunsad usab og martsa ang lain-laing grupo sa Washington, US niadtong Oktubre 12 ngadto sa Joint Base Lewis-McChord sa militar sa US. Nanawagan sila og hustisya sa pagkamatay ni Laude ug giduso ang pagpalayas sa tropang Amerikano sa Pilipinas.

Paryente sa mga OFW sa Lebanon, nagpiket sa DFA. Sa pagpanguna sa Migrante International, nagpiket niadtong Oktubre 10 atubangan sa Department of Foreign Affairs (DFA) sa Pasay City ang mga pamilya sa mga overseas Filipino worker sa Lebanon. Nanawagan sila sa ahensya nga maghimo og kumprehensibong plano aron masolusyonan ang ilang apela nga hinanaling luwason ug tabangan ang mga migranteng Pilipino nga naipit sa gubat agresyon sa US-Israel sa Lebanon.