Naglunsad og magkasunod nga protesta ang mga grupo sa mag-uuma ug kababayen-an sa kabanikanhan niadtong Oktubre 15 ug 16 aron dumdumon ang internasyunal nga adlaw sa kababayen-an sa kabanikanhan ug ang World Food(less) Day.

Gipasiugdahan sa Amihan National Federation of Peasant Women ang piket sa kababayen-an gikan sa Bulacan, Laguna ug Cavite atubangan sa Department of Agrarian Reform (DAR) aron iprotesta ang nagapadayong kawad-on sa tinuod nga repormang agraryo sa nasud.

Gihatagan nila og duut ang mga kaso sa pagpangilog og yuta ug kumbersyon sa mga yutang agrikultural sama sa pag-ilog sa Araneta Estates sa San Jose Del Monte City; Lupang Ramos sa Dasmariñas, Cavite; Hacienda Luisita sa TADECO, Aboitiz, ug Ayala Land Inc; mga yuta kung asa gikansela ang mga CLOA ug CLT sa Nueva Ecija; 6,000-ektaryang yuta nga nahisakop sa oil palm plantation sa Negros; mga yutang gisakop sa mga proyekto sa estado sama sa reklamasyon ug Laguna Lake Road Network nga magresulta sa malukpanong pagpalayas sa mga mag-uuma.

Giduso sa kababayen-ang mag-uuma ang tinuod nga reporma sa yuta, makatarunganong presyo sa ilang mga ani ug katungod sa yuta ug pagkaon.

Sa misunod nga adlaw, uban ang kababayen-an sa mga mag-uuma ug mangingisda nga nagprotesta sa Department of Agriculture (DA) aron kundenahon ang neoliberal ug inutil nga mga palisiya ug programa sa rehimeng Marcos nga nagpagrabe sa kagutom sa nasud. Naalarma sila sa palisiya sa importasyon nga ginakunsinti sa DA nga nagadaut sa lokal nga produksyon.

Ang mga protesta kabahin sa pagdumdum sa Bulan sa Mag-uuma. Gawas dinhi, gilunsad sa mga grupong mag-uuma ang mga asembleya, pagtuon ug uban pang mga aktibidad sa lain-laing bahin sa nasud. Gilunsad usab nila ang mga proyektong “bagsakan” sa mga ani sa Metro Manila ug Cebu, na gitambungan sa lain-laing organisasyon.