Human gipwersa ang mga drayber ug opereytor sa dyip sa Baguio City ug kasikbit niining mga lungsod nga ikonsolida ang ilang mga prangkisa, hingpit karong ginaduso sa lokal nga gubyerno dinhi ang jeepney phaseout pinaagi sa pagtaktak sa ilang mga ruta.

Sa taho sa lokal nga balangay sa Piston, anaa sa 96% sa mga lisensyadong dyip ang nagpailalum sa konsolidasyon tungod sa pagpanghulga sa LTFRB-Cordillera Autonomous Region nga ikansela ang indibidwal nilang mga prangkisa.

“Daghan ang napresyur ug napugos nga magpailalum sa proseso,” matud ni Carlito Wayas, presidente sa Piston Metro Baguio. Kaniadto pa lang, supak na ang mga drayber dinhi sa mini nga modernisasyon.

Labaw nga natin-aw ang laraw sa jeepney phaseout dihang gipagula sa syudad ang Ordinance No. 22 o ang Route Rationalization Plan nga nagplanong kibhangan ang mga ruta sa namasadang mga dyip, bisan pa sa mga konsolidado. Gikan sa kanhing 46, gihimong 31 na lamang. Ang 29 dinhi mga “rationalized” o giusang ruta, samtang duha ang bag-ong ruta nga molibot sa mga lugar pangturista.

Resulta niini, mohagba ang ihap sa mamahimong mopasadang dyip, gikan 2,164 nga yunit ngadto sa 1,544 na lamang. Kapin 2,000 ka drayber ug ilang mga pamilya ang mawad-an og panginabuhian. Pangutana sa mga komyuter, nganong magkibhang og hangtud 620 ka dyip bisan og midaku ang panginahanglan alang sa pangpublikong transportasyon?

Sa kasamtangan adunay usa lamang ka dyip alang sa 169 ka pasahero kada adlaw. Ilalum sa ordinansya, mamahimong usa kada 237 pasahero kini. “Dahumon nga mograbe pa ang maong kakulangon tungod sa padayon nga nagkadakung populasyon sa Baguio, pareho sa mga residente ug mga bisita,” matud nila.

Sigurado nga magresulta og kalibog sa mga komyuter, ingonman sa kagubot sa drayber nga dunay magkasapaw (overlapping) nga mga ruta. Gawas sa mga drayber ug opereytor, apektado usab ang mga kantina, vulcanizing shop ug mga dispatser nga nagsalig sa mga operasyon sa dyip.

Niadtong Setyembre, nag-apela batok sa pag-usab sa ruta ang mga drayber ug opereytor ilalum sa Baguio-Benguet Movement Against Jeepney Phaseout (BBMAJPO) ug Piston Metro Baguio. Gimakmak nila ang ordinansang gipagawas nga walay konsultasyon. Dismayado ang mga drayber sa kawalay-interes sa ahensya sa lokal na gubyeno sa ilang mga reklamo. Ni wala gidawat sa mga upisyal ang mga dokumentong nagpadayag sa ilang baruganan batok sa pagkibhang sa ruta.