Duterte, ginapasabat sa gyera kontra-druga. Nagprotesta ang mga myembro sang Bayan Muna sa atubang sang Manubo nga Panalgan sadtong Oktobre 11 kadungan sang pagtalakay diri angot sa ekstrahudisyal nga pagpamatay sa idalom sang rehimen ni anay Presidente Rodrigo Duterte. Kaupod ang mga pamilya sang mga biktima sang “gyera kontra-druga,” nagpanawagan sila para sa hustisya kag pagpasabat kay Duterte kag sa iban pa nga may kahilabtanan sa madamuan nga pagpatay.

Negosasyon para sa CBA sa Technol Eight, ginasulong. Sugod ulihi nga semana sang Septyembre, pito ka beses nga nagprotesta ang Technol Eight Philippines Workers Union-OLALIA-Kilusang Mayo Uno para iduso ang tayuyon nga negosasyon para sa bag-o nga collective bargaining agreement (CBA). Pinaka-ulihi sa mga ini ang protesta sadtong Oktobre 16 kag 17 sa ulubrahan sa Biñan, Laguna.

Piket sa Paperland. Ginkundenar sang unyon sang mga mamumugon sa Paperland ang iligal nga shutdown kag pagpang-ipit sang maneydsment sa lider sini nga si Renato “Rey” Ayroso. Nagpiket ang mga mamumugon sa atubang sang pabrika sini sa Quezon City sadtong Oktobre 17 para batikuson ang mga pagtilaw nga bungkagon ang ila nga unyon kag mga maniobra para pahalinon si Aryoso. Ang Paperland ang kumpanya nga nagahimo sang papel.

Barikada batuk sa demolisyon, gintukod sa Laguna. Gintukod sang mga residente sang Barangay Nueva, San Pedro, Laguna ang barikada sa ikatatlo nga semana sang Oktobre batuk sa peligro nga demolisyon sang Philippine Railways kag lokal nga gubyerno sang ila kabalayan. Wala sang ipakita nga dokumento para sa demolisyon ang PNR kag wala man sang nakahanda nga plano para sa relokasyon ang gobyerno sang San Pedro.

Kontra-mina nga protesta, gintigayon sa Romblon. Sadtong Septyembre 22, masobra isa ka libo nga Sibuyanon ang liwat nga nag-ugyon kag nagtipon para sa isa ka protesta kontra-mina sa San Fernando, Sibuyan Island, Romblon. Kabahin ini sang nagapadayon nga pagpamatok sang mga residente sa isla batuk sa mapangwasak nga pagmina sang Altai Philippines Mining Corporation nga pagpanag-iya sang pamilya Gatchalian.

Hustisya para kay Jennifer Laude! Ginlunsar sang mga grupo sang pamatan-on ang mga protesta kag aktibidad sadtong Oktobre 11 bilang pagdumdom sa ika-10 nga anibersaryo sang pagpatay ni Lance Corporal Joseph Scott Pemberton sang US Marines kay Jennifer Laude. May yara sang aktibidad sa University of the Philippines (UP)-Diliman, sa atubang sang Technological University of the Philippines kag sa UP Mindanao. Naglunsar man sang martsa ang lain-lain nga grupo sa Washington, US sadtong Oktobre 12 padulong sa Joint Base Lewis-McChord sang militar sang US. Nagpanawagan sila sang hustisya sa pagkamatay ni Laude kag ginduso ang pagpalayas sang tropang Amerikano sa Pilipinas.

Himata sang mga OFW sa Lebanon, nagpiket sa DFA. Sa pagpanguna sang Migrante International, nagpiket sadtong Oktobre 10 sa atubang sang Department of Foreign Affairs (DFA) sa Pasay City ang mga pamilya sang mga overseas Filipino worker sa Lebanon. Nagapanawagan sila sa ahensya nga maghimo sang komprehensibo nga plano para masabat ang apela nila nga gilayon nga luwason kag buligan ang mga migranteng Pilipino nga naipit sa gyerang agresyon sang US-Israel sa Lebanon.