Naglunsar sang sundanay nga protesta ang mga grupo sang mangunguma kag kababainhan sa kaumhan sadtong Oktobre 15 kag 16 para dumdumon ang internasyunal nga adlaw sang kababainhan sa kaumhan kag ang World Food(less) Day.

Ginpangunahan sang Amihan National Federation of Peasant Women ang piket sang kababainhan halin sa Bulacan, Laguna kag Cavite sa atubang sang Department of Agrarian Reform (DAR) para iprotesta ang nagapadayon nga kawad-on sang matuod nga repormang agraryo sa pungsod.

Ginhatagan nila sang tum-ok ang mga kaso sang pagpang-agaw sang duta kag pagbaylo-gamit sang mga dutang agrikultural pareho sang pagpang-agaw sang Araneta Estates sa San Jose Del Monte City; Lupang Ramos sa Dasmariñas, Cavite; Hacienda Luisita sa idalom sang TADECO, Aboitiz, kag Ayala Land Inc; mga duta kon sa diin ginkansela ang mga CLOA kag CLT sa Nueva Ecija; 6,000-ektarya nga duta nga ginsakop sang oil palm plantation sa Negros; mga dutang ginsakop sang proyekto sang estado pareho sang reklamasyon kag Laguna Lake Road Network nga magaresulta sa lapnagon nga pagpalayas sa mga mangunguma.

Ginduso sang kababainhan nga mangunguma ang matuod nga reporma sa duta, makatarunganon nga presyo sang ila mga ani kag kinamatarung sa pagkaon kag duta.

Pagkasunod nga adlaw, upod ang kababainhan sa mga mangunguma kag mangingisda nga namalpag sa Department of Agriculture (DA) para batikuson ang neoliberal kag inutil nga mga patakaran kag programa sang rehimen Marcos nga nagapalala sa kagutom sa pungsod. Ginapamatukan nila ang patakaran nga importasyon nga ginakunsinti sang DA nga nagahalit sa lokal nga produksyon.

Ang mga protesta ang kabahin sang pagdumdom sa Bulan sang Mangunguma. Magluwas diri, gintigayon sang mga grupo sang mangunguma ang mga asembliya, pagtuon kag iban pa nga mga aktibidad sa lain-lain nga bahin sang pungsod. Ginlunsar man nila ang mga proyekto nga “bagsakan” sang mga ani sa Metro Manila kag Cebu, nga gintambungan sang nagkalain-lain nga organisasyon.