Kapin 7,000 ka mamumuo, uban ang kabatan-onan ug uban pang demokratikong sektor, ang nagmartsa padulong sa Mendiola sa Maynila niadtong Mayo 1, Adlaw sa Pamuo. Nanawagan sila nga patas-an ang suhulan sa makabuhi nga ang-ang sa tibuok nasud. Adunay susamang mga protesta ang mga mamumuo sa mga syudad sa Baguio, Angeles, Calamba, Naga, Cebu, Iloilo, Roxas, Bacolod, ug Davao, ug sa lungsod sa Rosario sa Cavite.

Matud sa mga mamumuo, angayan lamang nga patas-an ang minimum nga suhulan sa makabuhing ang-ang nga ₱1,200 tungod sa nagkataas nga gasto sa panimuyo ug pipila ka dekada nang gipugngang pagsaka sa suhulan. Sa karon, anaa sa 36% hangtud 54% ang gakadawat nga suhulan sa mga mamumuo kumpara sa ilang panginahanglan. Giduso nilang bungkagon ang mga regional wage board nga nagahatag og sinsilyong pagtaas. Panawagan usab nila ang pagtapos sa kontraktwalisasyon ug pagpanalipud sa katungod sa unyon, lakip ang katungod sa pag-organisa ug kolektibong pakignegosasyon.

₱200 across-the-board

Dungan sa panawagan sa makabuhing suhulan, giduso sa National Wage Coalition (NWC) ang pagbalaod sa ₱200 dugang-suhulan aron hinanaling mahatagan og alibyu ang mga mamumuo. Ginaduso sa koalisyon ang sugyot atubangan sa pipila ka tuig na nga pagbalewala sa mga sugyot nga dugang-suhulan sa Kongreso ug Senado. Kung maaprubahan, kini ang unang nasudnong pagtaas sa suhulan nga ipaagi sa balaod sa miaging 36 ka tuig. Gilangkuban ang NWC sa 30 ka mga sentro sa pamuo, lakip ang KMU.

Sama sa gidahum, gisubli lamang ni Ferdinand Marcos ang tubag nga “tun-an” ang sugyot. Sukwahi kini sa kapaspas sa pag-apruba sa rehimen sa kamanduang ehekutibo nga nagdugang og ₱200 sa inadlawang alawans sa mga sundalo ug pulis karong tuiga.

Diskriminasyon sa suhulan sa kabanikanhan

Makabuhi nga suhulan usab ang panawagan sa mga mamumuo sa agrikultura sa Adlaw sa Pamuo. Matud sa Unyon ng mga Manggagawa sa Agrikultura (UMA), kung ubos ang suhulan sa kasyudaran, mas ubos ang suhulan sa mga mamumuong-panguma bisan sa mahinungdanong papel nila sa produksyon sa pagkaon.

Daw mga “third class citizen” o ubos nga klaseng mga tawo ang mga mamumuo sa kabanikanhan, matud sa UMA. Sa Eastern Visayas, pananglitan, anaa sa ₱390 lamang ang suhulan sa mga mamumuo sa agrikultura, nga 32.5% lamang sa makabuhi nga suhulan. Sa Negros, kung asa makita ang dagkung asyenda, liboan ka mga mamumuong-pangma ang nahikot sa sistema sa pakyawan nga mas ubos pa sa gitakdang minimum nga suhulan ang gakadawat alang sa mga mamumuo sa agrikultura.

Dugang sa ubos kaayong suhulan, nag-atubang usab sila sa dili-makitawhanon ug peligrosong mga kundisyon sa trabaho. Sagad silang na-ekspos sa makahilong mga kemikal, grabeng init sa adlaw ug uban pang sitwasyong makadaut sa ilang panglawas.

Hagit sa mga mamumuong Pilipino

Sa pamahayag sa Partido Komunista ng Pilipinas sa Adlaw sa Pamuo, giawhag niini ang mamumuong Pilipino nga maghiusa ug molihok aron magsilbing lig-ong dugukan, lapad nga pwersa ug lider sa pakigbisog sa katawhang Pilipino alang sa nasudnon ug katilingbanong paglingkawas.

Kinahanglan nilang iasdang ang militanteng mga pakigbisog sa unyon aron ipanghingusog ang makabuhi nga suhulan, ug panalipdan ang demokratikong interes ug kaayuhan sa mga mamumuo, matud niini. Kinahanglan nilang gunitan ug gamiton ang welga isip armas sa ilang mga ekonomikanhon ug pulitikanhong pakigbisog.

Matud sa Partido, kinahanglang ibutang sa mga mamumuong Pilipino ang ilang han-ay sa unahan sa mga pakigbisog sa katawhan, lakip ang pagbatok sa korapsyon sa nagharing rehimen, mga pasistang krimen, walay hunong nga pagsaka sa presyo sa mga palaliton ug walay puas nga importasyon sa bugas. Kinahanglan nilang palanugon ang panawagan alang sa tinuod nga reporma sa yuta ug nasudnong industriyalisasyon ug nasudnong demokrasya.

Kinahanglan usab nga suklan ang Balikatan ug mga war games nga pagpanghulhog og gubat sa US ug ang pagpakaitoy sa rehimeng Marcos sa iyang imperyalistang amo. Nanawagan usab kini sa mga mamumuong Pilipino nga ipakita ang pakighiusa sa katawhang Palestino batok sa henosidyo sa Zionistang estado sa Israel.