Sa matag higayon nga adunay Pulang manggugubat sa Bagong Hukbong Bayan nga gikan sa sektor sa kabatan-onang estudyante nga namatay sa engkwentro (o tinuyo nga gipatay) sa Armed Forces of the Philippines (AFP), walay laing yawyaw ang National Task Force (NTF)-Elcac gawas sa panginahanglang sumpuon ang ideya ug hunahuna sa kabatan-onan sa mga unibersidad. Giingon nila nga kini usa ka paagi aron pugngan ang pagsalmot sa kabatan-onan sa armadong pakigbisog o gitawag niining “radikalisasyon” o “terrorist grooming.”

Ang maong taktika sa AFP ug NTF-Elcac naggikan ug nakabase sa doktrinang “countering violent extremism” (CVE o “pagbatok sa bangis nga ekstremismo”) sa US. Ang bisan unsang ideya nga giisip nga “hulga” sa nagharing sistema gitawag nga “ekstremismo” o “hilabihang ideolohiya.” Ginapantabon ang CVE sa pagsumpo sa tanang porma sa pagpadayag ug pagbatok sa estado. Ginapagawas niini nga ang “ekstremismo” mao ang nagduso sa katawhan nga mosukol, lakip na ang lehitimo ug makatarunganong pag-armas sa katawhan batok sa reaksyunaryong nagharing estado. Dili simpleng mga ideya ug pagtuo nga nagmugna niini, kundili ang mismong kongkretong kahimtang sa pagpanglupig, pagpahimulos, ug kabangis sa estado.

Ang doktrina ug programa sa CVE

Ang CVE unang gipatuman ilalum sa administrasyon ni Obama sa US niadtong 2014. Gigamit kini sa kampanya batok sa Muslim o pagpakaylap sa Islamophobia, ug gitarget usab ang mga progresibong aktibistang pulitikal. Gipakita sa doktrina nga ang mga Muslim ug aktibista “bangis sa kinauyukan.”

Gigamit ang CVE aron sa pagpulis ug pag-profile sa mga lider sa komunidad base sa ilang mga lihok, ilabina sa relihiyon, kaliwatan, ug pulitika. Tumong niining bantayan ang “radikalisasyon” sa mga indibidwal nga giingong hinungdan sa “terorismo.” Gitawag usab kini og “soft counterterrorism.”

Bisan wala pay gihimo ang usa ka tawo, mahimo nang tawgong “terorista” ang iyang batasan ug panghunahuna. Supak kini sa mga batakang tawhanong katungod sama sa katungod sa pribasiya, pagpadayag, paglihok, pag-organisa ug uban pa. Nagmugna kini og kahadlok ug nagresulta og “self surveillance” o pagbantay sa kaugalingon aron dili madudahan, ug nagaguba sa mga komunidad.

Mga kadaut sa CVE sa Pilipinas

Niadtong 2019, gihimo ug gipasiugdahan sa gubyerno sa Pilipinas pinaagi sa Anti-Terrorism Council ilalum sa Human Security Act ang National Action Plan on Preventing and Countering Violent Extremism (NAP P/CVE). Nakasulat nga tumong niini ang pagdumala sa mga programa nga motubag sa pulitika, ekonomiya, kultura, psychosocial ug relihiyosong aspeto sa “radikalisasyon” nga mosangpot kuno sa “bangis nga ekstremismo.”

Gipahimutang kini ilalum sa Department of Interior and Local Government (DILG) kaabag ang uban pang ahensya sa gubyerno. Gitudlo sa plano ang unum ka “bulnerableng sektor” nga kinahanglan sudlan aron pugngan ang “radikalisasyon.” Kini mao ang komunidad, mga detinidong pulitikal ug mga kaso sa “terorismo,” mga lider relihiyoso, unibersidad, mga social media user, mga overseas Filipino workers ug mga relihiyosong iskolar.

Ang NTF-Elcac mao ang nag-unang nagdumala ug nagkoordinar sa mga programa ilalum sa plano. Giila kini nga “whole-of-nation approach,” nga pundasyon sa ahensya. Ang NTF-Elcac ang nakig-estorya sa mga klaster, pangrehiyon ug lokal nga task force aron ipatuman ang NAP P/CVE.

Sa aktwal, ang plano nahatagan og hulagway sa Retooled Community Support Program (RCSP) niadtong Oktubre 2019 pinaagi sa memorandum sa DILG aron sudlon ang mga komunidad. Sa gambalay sa NAP P/CVE, gipatuman usab ang Enhanced Comprehensive Local Integration Program (E-CLIP) niadtong Marso 2020 aron targeton ang mga “nagbalik-loob” o mga preso.

Sa mga unibersidad ug eskwelahan, ang NTF-Elcac ug mga ahensya sa seguridad sa estado nagpahiigayon og mga porum, leadership training, camping, gimbuhatong kooperatiba ug uban pang interbensyon aron hisgutan ang “radikalisasyon.”

Usa niini mao ang kampanya sa Red-tagging nga naglimita sa kagawasan sa paghunahuna, pag-organisa, pagpadayag ug uban pang katungod sa kabatan-onan. Adunay mga kaso usab diin gikumpiska sa NTF-Elcac ang mga libro sa mga librarya sa unibersidad nga hinungdan sa “radikalisasyon.”

Pinakagrabe, ginapugos sa militar ug NTF-Elcac ang mga administrador sa eskwelahan nga mosunod sa ilang mga mando. Sa ingon niini nga pamaagi, gisulod sa AFP ang usa ka kasabutan sa kooperasyon sa University of the Philippines. Kini usab ang nag-unang tumong sa NTF-Elcac dihang gipasulod ang COCOPEA, grupo sa mga pribadong eskwelahan, isip kabahin sa komite niini.

Daku kaayo ang kahadlok ug troma nga gibunga sa doktrinang CVE sa kabatan-onan ug katawhan. Tungod niini, daghan ang nagduha-duha sa pagpadayag sa ilang opinyon sa social media ug motingog para sa ilang batakang katungod.